«Құрметті ханымдар мен мырзалар! Қазақстанның басты мерекелерінің бірі – Конституция күні қарсаңында Сіздерді «Конституция және қоғам мен мемлекеттің жаңғыруы» атты халықаралық ғылыми-практикалық конференциясының ашылуымен шын жүректен құттықтаймын. Біздің Ата Заңымыз заңдылықтың, келісімнің және еліміздің қарқынды дамуының кепілі болып табылады. Бүгінде Қазақстанды бүкіл әлемде жаһандық антиядролық қозғалыстың көшбасшысы деп таниды. Біздің еліміз БҰҰ қауіпсіздік кеңесінің тұрақты емес мүшесі болды. Астанада ЭКСПО-2017 халықаралық мамандандырылған көрмесі өтуде. Елімізде экономика мен әлеуметтік сала нығаюда. Бизнес пен азаматтық қоғам дамуда. Біз Конституцияны басшылыққа ала отырып, ауқымды мәселелерді шешеміз және 2050 жылға қарай Қазақстан әлемнің дамыған 30 елінің қатарына енуі тиіс. Биыл біз ел дамуының 25 жылдық тәжірибесі мен жұртшылық пікірін кеңірек ескере отырып, конституциялық реформа жүргіздік. Оның негізі билік тармақтары арасында бірқатар өкілеттіктерді қайта бөлу, Парламент пен Үкіметтің дербестігі мен жауапкершілігін нығайту, қорғалатын конституциялық құндылықтарды, адамның және азаматтың құқықтары мен бостандықтарын қорғау тетіктерін нығайту, сот жүйесі мен мемлекеттік басқару негіздерін жаңғырту. Конституциялық өзгерістер қоғам мен мемлекеттің тыныс-тіршілігінің барлық салаларын одан да әрі жаңғыртудың берік негізін қалайды. Осы тұрғыда Қазақстанда конституциялық реформа мен оны іске асыру қазақстандықтардың да, шетелдік қонақтардың да зор қызығушылығын тудырады. Конференцияға қатысушылардың идеялары мен ұсыныстары бізге пайдалы болады, ал Конституцияның жасампаздық әлеуетін жан-жақты іске асыру жолындағы бірлескен күш-жігер елді дәйекті жаңғыртуға ықпал етеді деп сенемін. Қатысушыларға табысты және нәтижелі жұмыс тілеймін» делінген Елбасы жолдаған құттықтау хатта.
Айтулы жиынға халықаралық деңгейдегі сарапшылармен қатар, ел билігіндегі жоғары шенді тұлғалар да қатысып, мемлекет дамуындағы Конституцияның маңыздылығын айрықша атап өтті. Соның қатарында Жоғарғы сот Төрағасы Қайрат Мәми қазіргі Ата Заңымыз қоғамдық қатынастардың барлық саласында жаңа табыстарға қол жеткізудің кепілі екендігіне кеңінен тоқталды.
Сондай-ақ, конференцияға қатысқан Грузия Жоғарғы сотының төрағасы Нино Гвенетадзе де қазақстандық әріптестері мен отандастарымызды Конституция күнімен құттықтап, екі ел арасындағы қарым-қатынастың ертеңіміз үшін игілігі мол екендігіне шүбә келтірмейтіндігін білдірді.
«Біз құқық қорғау саласы мен қоғамдық тәртіпті сақтау қызметінде өз елімізде сәтті жүзеге асқан жобаларымызды қазақстандық әріптестерімізге тәжірибелік тұрғыда жарқын жүзбен ұсына аламыз. Мұндай әрекет екі ел арасындағы сала мамандарының білім, біліктілігін арттыра түсетіндігі сөзсіз және ол тараптар үшін тиімді деген ойдамын. Сол сияқты сот саласындағы ашықтық пен әділеттілік қағидаттарын қамтамасыз етуде азаматтық істер мен құқықтық істерді қарау процестерінде де үйренетін үрдістеріміз аз емес», деді ол.
Сонымен қатар, Қазақстан Конституциясында қоғамның құқықтық тұрғыда даму бағдарлары айшықталып, нақтыланғанын атап өткен жөн. Жаңа демократия елдерінің конституциялық бақылау органдары конференциясының төрағасы, Армения Республикасы Конституциялық сотының төрағасы Гагик Арутюнян Ата Заңымыз арқау еткен талап-тілектер Қазақстанның құқықтық мемлекет ретінде дамуының басты мақсаты екендігін екшеп айтты.
Айта кетейік, Мемлекет басшысы Н.Назарбаев жария еткен «Болашаққа бағдар: рухани жаңғыру» атты мақалада көрсетілген бағыт-бағдарларға орай, үндестіріле отырып ұйымдастырылған конференцияның екінші күні панелдік сессиялар арқылы Қазақ гуманитарлық заң университеті мен Л.Н.Гумилев атындағы Еуразия ұлттық университетінде жалғасын тапты. Онда заң саласының сарапшылары мен білікті мамандары ел Конституциясы мен азаматтық қоғамның және мемлекеттің бүгінгі күн талабына сай жаңғыруының жай-күйін жан-жақты талқылады.
Нұрлыбек ДОСЫБАЙ,
Суретті түсірген Ерлан ОМАР,
«Егемен Қазақстан»
