Кеше СІМ-нің ресми өкілі – Халықаралық ақпарат комитеті төрағасының орынбасары Алтай Әбибуллаев дәстүрлі апталық брифинг өткізіп, сыртқы саясатта жүргізілетін шаралармен таныстырды.
Ресми өкіл осы күндері Қазақстан Республикасы Парламенті Мәжілісінің Төрағасы Орал Мұхамеджанов бастаған парламенттік делегацияның Бернде өтіп жатқан Парламентаралық Одақ Ассамблеясының 125-ші отырысына қатысып жатқандығын хабарлады. Осы шараның аясында ядролық қарусыздану тақырыбына арналған қызу пікір алмасу өтіп, онда негізгі баяндамамен Қазақстан Республикасының Мемлекеттік хатшысы Қ.Саудабаев сөз сөйлегенін жеткізді.
Ал 17-18 қазан аралығында елімізге Қазақстан-Колумбия қарым-қатынастары тарихында тұңғыш рет колумбиялық делегация жұмыс сапарымен келіп, мемлекеттік мекемелердің басшыларымен және еліміздің іскер топтарының өкілдерімен кездесуді жоспарлап отырғанын журналистерге баян еткен ресми өкіл сыртқы саясаттағы өзге де маңызды шараларды хабарлады.
Мәселен, 19 қазанда Санкт-Петербургте Қазақстан Республикасының Премьер-Министрі Кәрім Мәсімовтің қатысуымен Еуразиялық экономикалық қоғамдастықтың Мемлекетаралық кеңесінің 31-ші және Кеден одағының жоғары органы – Еуразиялық экономикалық қоғамдастықтың Мемлекетаралық кеңесінің отырыстары өтеді, деді А.Әбибуллаев. Оған ЕурАзЭҚ-қа мүше мемлекеттердің үкімет басшылары қатысып, экономикалық қоғамдастықтың өзекті мәселелері мен даму басымдықтарын талқылайды.
Ал 19-20 қазан күндері Елбасы Нұрсұлтан Назарбаевтың шақыруымен Әзербайжан Президенті Ильхам Әлиевтің елімізге ресми сапары болып, оның аясында екі мемлекет басшыларының қатысуымен екеуара және кеңейтілген құрамда келіссөздер өтеді. Олардың қорытындысы бойынша Қазақстан мен Әзербайжан президенттері арасында, сондай-ақ бірқатар үкіметаралық келісімдерге қол қою жоспарланған, деді ресми өкіл.
Алдағы аптада ең басты сыртқы саяси іс-шара – бұл 20-21 қазанда Алматыда өтетін Түркітілдес мемлекеттер ынтымақтастығы кеңесінің алғашқы саммиті, деген ресми өкіл саммит алдында 20 қазанда Алматыда Сыртқы істер министрі Ержан Қазыхановтың қатысуымен Түркітілдес мемлекеттер сыртқы істер министрлері кеңесінің отырысы өтетінін мәлімдеді.
21 қазан күні Түркітілдес мемлекеттер ынтымақтастығы кеңесінің алғашқы саммиті аясында Қазақстанға жұмыс сапарымен Түрік Республикасының Премьер-министрі Реджеп Тайып Ердоған келеді.
Түркия Үкімет басшысының қатысуымен Алматы маңында қазақ-түрік лицейінің ашылуы жоспарланса, 18-19 қазанда Измир қаласында (Түрік Республикасы) Азиядағы өзара іс-қимыл және сенім шаралары жөніндегі кеңестің (АӨСШК) Арнайы жұмыс тобының (АЖТ) және Аға лауазымды тұлғалар комитетінің (АЛТК) кезекті мәжілістері өтетін болады.
Анар ТӨЛЕУХАНҚЫЗЫ.