Кеше Қазақстан Республикасы Қауіпсіздік Кеңесі жанындағы Сараптама кеңесінің отырысы өткізілді.
Күн тәртібінде Қазақстандағы су қауіпсіздігі мен азық-түлікпен қамтамасыз етудің өзекті мәселелері қарастырылды. Талқылау барысында Қазақстан Республикасы Президентінің көмекшісі – Қауіпсіздік Кеңесі Хатшылығының хатшысы Марат Тәжин ғаламдық үрдістер мен Қазақстан экономикасының қарқынды дамуы азық-түлік пен су ресурстарын басқаруда мемлекеттік саясатты жетілдіруді қажет ететіндігін атап өтті.
Сарапшылардың пікірінше, Қазақстан Республикасындағы азық-түлік қауіпсіздігін қамтамасыз етуде маңызды шара ауыл шаруашылығы өнімдерін және азық-түлік рыногын дамыту болып табылады. Отырыс барысында ұлттық деңгейде су қауіпсіздігін қамтамасыз ету мәселесі аймақтағы жағдайды ескере отырып, терең сарапқа салынды.
Отырыстың қорытындысы бойынша Сараптама кеңесі Қазақстан Республикасы Қауіпсіздік Кеңесі және оның ведомствоаралық комиссия жұмысында қолдану үшін нақты ұсыныстар берді.
«Егемен-ақпарат».