Кеш басында Ардақ «Ауылым көшіп барады», «Желсіз түнде жарық ай», «Бозбала», «Ойлан, құрбым» сынды әндерін Президенттік оркестрдің сүйемелдеуімен көрермендерге тарту етсе, Кенен Әзірбаевтың сөзіне жазылған «Жақсы болса жан жарың» әнін үш ішекті домбырамен, сондай-ақ «Асыл зат», «Қоңыр жел» әндерін қос ішекті домбырамен орындап берді. Кешке әншінің өнердегі құрбы-құрдастары мен аға буын өкілдері Досымжан Таңатаров, Клара Төленбаева, Елмұра Жаңабергенова, Ерболат Шалдыбаев қатысып, жыр-термелер мен эстрадалық әндер орындады.
Ардақтың өнерге келуі, оның шығармашылық жетістіктері, әнші ретіндегі ерекшеліктері туралы ата-анасы Сәбира Ахметова мен Байділхан Балажановтың, өнердегі ұстаздары Бекболат Тілеухан, Бақытжан Кененұлының пікірлерін, лебіздерін көрермен залдағы үлкен экран арқылы тамашалады. Бақытжан Кененұлы әншіге ең бірінші қажет нәрсе – дауыстың Ардақта бар екенін, оның кең тынысты әншілердің қатарына жататынын айтса, Бекболат Тілеухан оның өзіне тән ырғақпен сыршыл әндер айтатынын, сондай-ақ өз мәнерін тапқан әнші екенін жеткізді.
Кеш барысында Ардақ Балажанова «Пай-пай» триосымен бірге де ән салды. Сондай-ақ «Наз» мемлекеттік би театрының да өнері көпшілікке ұсынылды.
Айгүл СЕЙІЛ,
«Егемен Қазақстан»
