Алматы аруы Қазақстан атынан «Әлем аруы-18» байқауына барады

Бұл жеңістің басты бақыты – ажарымен, ақылымен, өнерімен алдына жан салмаған аруға келесі жылы АҚШ-та өтетін «Әлем аруы-2018» байқауында мұқым қазақ қыздарының көркін паш ету бұйырды. «Алматы аруы» атанған қыздарға 2015 жылдан бері әлемдік мінберге жол ашылғанын айта кетелік. 

Сәбиналардың бәрі сұлу, бұған дейін де Сәбина Алтын­баева ешкімге ұқсамайтын қазақ қыздарының сүйкімділігін күллі әлемге танытқан. 
Енді «Тұран» колледжінің студенті келесі жылы әлемнің ең сұлу да білімді бойжеткендері көтерілген мінберден табылмақ. 

Бір күнде айы оңынан туған Сәбина мамандығы бойынша болашақ аудармашы әрі гид. Оны жасынан ересек көрсететін сырт келбеті ғана емес, тір­лі­гі, өзін өзі ұстауы десек жа­ңылыса қоймас­пыз. 

Қысқасы, биыл «Алматы аруы-2017. Сұлулық қуаты» атауы­­­мен өткен кезекті байқауға қаты­суға 400-ден астам қыз ұм­тыл­ған. Олардың арасынан 10 сұлу ғана қазылар алқасының барлық талаптарынан табылды. Тағы бір қызығы, биыл бірінші рет аталмыш байқауда қыздардың ерекше бір таланты сынға түсті. Байқаудың ақтық бағдарламасына қойылған бұл кезеңге қыздар барын салды. Көрермендер де көңілді болды. 

Жарыс барысында арулардың барлығы да бағына сиынғаны сөзсіз. Өйткені бұл жарыста жеңімпаз болу бір бөлек те, түрлі мүмкіндіктерге ие болу бақыты да бар еді. Мәселен, байқаудың бас жүлдесінен кейінгі орындарды бөліскен Алина Мелкина мен Дарья Галочкинаға Грекияда 4 жыл білім алуға жол ашылды. Олар бұл елде ағылшын тілін терең меңгеретін болады. 

Ал қазылар алқасына кіл сұлудың ішінен бір сұлуды таңдау шынында да оңай бол­маған. Жастардың бәрі де көрік­ті, өнерлі. Оның үстіне «Ал­маты аруы-2017» атанған сұлу бүкіл Қазақстан атынан әлем­дік байқауға қатысып, оған төрт­күл дүние көз салатыны тағы бар. 

Дегенмен Сәбина жарыстың барлық кезеңдерінде өзіне сенімді болғанын байқау қиын емес. Қанша толқыса да бас жүлдеге лайықпын деген ішкі қуат пен сенім оның түйсігін алдамады. Оған қоса арулар байқауына қатысып жатқан қызды колледжі де қолдап, сессияны кейін тапсыруға мүмкіндік берген. 

Ол бірінші кезекте спортты, оның ішінде боксты, биді жақсы көреді. Геннадий Головкиннің спорт­тағы жетістіктеріне сүйсі­неді. Және өзін өз елінің патриоты деп білетін қыз Қазақстанды жақ­сы қырынан көрсету үшін бар өнерін салып дайындалмақ. 

Айнаш ЕСАЛИ,
«Егемен Қазақстан»

АЛМАТЫ