Нақтырақ айтқанда, Есіл ауданындағы №7 агротехникалық колледж студенттері дуалды оқыту жүйесінің арқасында білімдерін толықтырып қана қоймай, сонымен қатар тікелей өндірісте өз біліктіліктерін де арттыра алды.
Былтыр осындай өндірістік тәжірибеден өтудің арқасында студенттердің 1,5 миллион теңге табыс тапқандығы оларды еңбекке ыңталандыра түсетіні айтпаса да түсінікті. Жалпы, аталған колледж 2015 жылдан бері «Тамақтануды ұйымдастыру» мамандығы бойынша дуалды оқытуды қолға алған болатын. Ал 2016 жылы Ақмола облысының кәсіпкерлер палатасында тіркелген. Содан аталған мамандық бойынша үшжақты 39 келісімшарт түзіліп, дуалды оқыту жүзеге асырыла бастады. Бұдан басқа, жыл сайын көктемгі егіс науқаны мен күзгі жиын-терімде шаруа қожалықтары студенттерді «Фермерлік шаруашылық», «Дәнекерлеу ісі» мамандықтары бойынша кәсіби тәжірибеден өтуге қабылдап келеді. Әсіресе тәжірибеден өтушілер ішінде тракторшылар, дәнекерлеушілер, есепшілер, аспаздар үлкен сұранысқа ие. Колледж директорының оқу-өндірістік жұмыс жөніндегі орынбасары Наталья Бойко оқыту процесінің кестесі студенттерді тәжірибеден өткізуге қабылдайтын әріптестердің жұмыс ерекшелігіне қарай түзілетінің ерекше атап кетті.
Студенттердің кәсіптік тәжірибеден өтуі үшін қажетті кәсіпорындардың саны қазіргі кезде 40 жетсе, осыншама база қалыптасқандығын ерекше атай кеткен жөн. Н.Бойко бұл ретте таңдау құқы заманауи материалдық-техникалық базасы бар, білікті мамандары жеткілікті және ұзақ уақыттан бері өзара тиімді негізде студенттердің тәжірибеден өтуі үшін өз базаларын ұсынып келе жатқан кәсіпорындарға берілетіндігін алға тартады. Осындай толыққанды кәсіби тәжірибеден өтудің арқасында оқуын бітірген студенттер тез жұмысқа алынып жатады. Мемлекеттік зейнетақы төлеу орталығының таратқан мәліметіне сенсек, 2016 жылдан бастап колледж түлектерінің зейнетақы есеп шоттарында қаржы жинала бастаған.
Асқар ТҰРАПБАЙҰЛЫ,
«Егемен Қазақстан»
Ақмола облысы
