Кеше Қазақстан Республикасының Сыртқы істер министрлігінде БҰҰ күніне және еліміздің Тәуелсіздігінің 20 жылдығына арналған дөңгелек үстел болып өтті. Аталған іс-шараға мемлекеттік органдардың, дипломатиялық корпустың және БҰҰ жүйесінің өкілдері қатысты.
Қатысушыларға арнап Қазақстанның Сыртқы істер министрі Е.Қазыханов пен БҰҰ-ның еліміздегі резидент-үйлестірушісі С.Тулл сөз сөйледі. Өзінің сөзінде Е.Қазыханов 1992 жылдың 2 наурызында БҰҰ Бас Ассамблеясының 46-шы сессиясының 46/224 шешімінде Қазақстан Республикасы бірауыздан БҰҰ-ға мүше болып қабылданғанын атап өтті.
Бұл оқиға мемлекет үшін үлкен саяси мағына берді. Қазақстан Республикасының Президенті Нұрсұлтан Назарбаев осыған орай «Бұл оқиғаның мәні баға жеткізгісіз. Біз халықаралық құқықтардағы өзіміздің ұстанымымызды дәлелдеп қана қоймай, әлемде қауіпсіздік орнатудың негізгі жұмысында аталған беделді ұйымның мүдделерін бірге қорғауға атсалысып отырмыз», – деді.
Қазақстан БҰҰ-ға мүше болғалы бері халықаралық қоғамдастықпен ықпалдастығы арта түсті. Ұйым аясындағы барлық іс-шараларға үлкен белсенділікпен қатысып келеді. Ынтымақтастықты дамытудың басты қадамдары ретінде Президент Н.Ә.Назарбаевтың БҰҰ-ның Нью-Йорктегі штаб-пәтеріне ресми сапарлары мен БҰҰ Бас Ассамблеясының жұмыстарына қатысуы және БҰҰ Бас хатшылары Кофи Аннанның 2002 жылы, Пан Ги Мунның 2010 жылы Қазақстанға жасаған сапарларын айтуға болады. Елбасының БҰҰ мінбесінен айтылған халықаралық бастамалары қазіргі уақытта сәтті іске асырылуда.
Дөңгелек үстелде С.Тулл Қазақстанның БҰҰ-мен 20 жылға жуық өнімді өзара ықпалдастығының негізгі сәттерін, ынтымақтастықтың болашағын, сондай-ақ қатынастарымыздың жаңа сапалы деңгейге өту мүмкіндіктерін атап өтті. Жиын барысында Қазақстанның тұрақты дамуына байланысты мазмұнды әңгіме өрбіді.