Максимовка кентінен 10 тұрғын үй салып жатқан жеке кәсіпкер құрылысты жыл соңына дейін толық аяқтауды жоспарлап отыр. «Свободное» ЖШС ауылшаруашылық дақылдарын өсірумен және мал шаруашылығымен айналысады. Бүгінгі таңда аталған шаруа қожалығында асыл тұқымды 1500 ірі қара мал бар. Мал бағып, істерін өрге дөңгелетіп жатқан қожалық табыссыз да емес. Оған серіктестіктің өз қызметкерлеріне тұрғын үйлер салып беруі дәлел. А.Закулисов басшылық ететін шаруашылықта 200 адам жұмыс істейді екен. Бір бөлігі – өзге өңірлерден көшіп келген отбасылар. Сондықтан да баспанамен қамтамасыз ету күн тәртібінен түспеген өткір мәселе болатын. Ал кентте бос үй жоқ.
Қазіргі кезде «Свобода» ЖШС-да жұмыс істейтін 5 қызметкер отбасыларымен жаңа қоныстарына орналасып та үлгерді. Қалған 5 отбасы жыл соңына дейін қоныс тойларын тойламақ. Бұған дейін А.Закусиловтың бастамасымен кентте 7 коттедж тұрғызылғандығын айта кеткен орынды. Араға 8 жыл салып соның екеуін кәсіпорын директоры ауылдық амбулаторияның бас дәрігері мен «Свобода» ЖШС бас инженеріне қайтарымсыз негізде жеке меншігіне өткізіп берді. Сондықтан Максимовка кентіне педагогтар, дәрігерлер, техникалық қызметкерлер еш ойланбастан келіп жатады. Оның себебін олардың жемісті жұмыс істеуі үшін барлық жағдайдың жасалуынан деп білуге болады.
Асқар ТҰРАПБАЙҰЛЫ,
«Егемен Қазақстан»
Ақмола облысы,
Сандықтау ауданы
