Кеңес отырысында әлеуметтік жарнамаларды орналастыру, бұқаралық ақпарат құралдарындағы қазақ тілінің жағдайы, «Ашық үкімет» порталын дамыту сияқты бірқатар мәселелер талқыланды.
Ақпарат және коммуникациялар министрлігінің БАҚ саласындағы мемлекеттік саясат департаментінің директоры Елдос Нәшірәлінің ақпаратына сүйенсек, отандық телеарналар эфир уақытының 1 пайызын әлеуметтік роликтерге бөлуді жоспарлап отыр. Яғни, күніне 2 мезгіл 45 секундтық бейнекөрсетілім кешкі уақытта көрермен назарына ұсынылмақ. Е.Нәшірәлінің пікірінше, мұндай әлеуметтік роликтер отбасы құндылықтарын, адамгершілікті және патриотизмді насихаттайды.
«Qazaqstan» РТРК» басшысы Ерлан Қарин теледидар көру рейтингін анықтаудың кемшіліктеріне тоқталды. Оның айтуынша, қазіргі жүйе нақты жағдайды көрсетпейді.
«БАҚ саласындағы мемлекеттік тілдің дамуына ықпал ететін фактор – зерттеу компанияларының нәтижесінің сапасы. Алайда олар келтірген рейтинг шындықтан алшақ жатыр. Мысалы, «TNS Central Asia» компаниясы зерттеуді ірі қалаларда тұратын 2200 тіркелген абоненттер арасында жүргізген. Респонденттердің 58 пайызы қазақтілді. Қазақтілді аудиторияның басым бөлігі қалаларда емес, шет жақта,
ауылдарда тұрады. Сондықтан, олардың талғамдары ескерілмей қалады», – деді Е.Қарин.
«Qazaqstan» телеарнасы басшысының пайымдауынша, нақты рейтингке қол жеткізу үшін зерттеуді түрлендіру қажет. Ол сауалнама, блиц-интервью, әлеуметтік зерттеулер жүргізіп, фокус топтармен жұмыс істеу керектігін айтты.
Отырыс барысында ұлттық доменді ауыстыру мәселесі де сөз болды. Қоғамдық кеңестің мүшесі Нұрлан Исин «kz» доменін «qz»-ге өзгертуді ұсынды. Ол ертерек қимылдамаса, «qz» доменін басқалар иемденіп кетуі ықтимал екенін айтады.
«Ұлттық доменді жаңа әліпбиге сәйкес латынша «qz»-ге ауыстыру қажет. Бұл мәселені тез шешкеніміз жөн. Сондықтан, осыған жауапты мекеме ICANN-ға сұраныс жіберілуі тиіс», – деді Н.Исин.
Жиында «Ашық үкімет» порталының жұмысы да талқыланды. Бұл жөнінде Ақпарат және коммуникациялар министрлігінің БАҚ саласындағы мемлекеттік саясат департаменті директорының орынбасары Бекзат Рахимов баяндама жасады. Оның айтуынша, портал қазіргі таңда екі тілде қажетті ақпараттарды таратып отыр.
Абай АСАНКЕЛДІҰЛЫ,
«Егемен Қазақстан»
