Талаптың тұлпарын мінген жас таланттар қазіргі таңда қабілеттерін ұштап, сахнадағы алғашқы қадамдарын жасап жүр. Олардың көрермен көзайымына айналар сәулелі сәттері әлі алда.
Сенбі күні «Астана балет» театрында осынау оқу ордасының айтулы мерекесі – студенттер қатарына қабылдау салтанаты өтті. Академияға жаңадан түскен жеткіншектердің жанарында қуаныш оты жарқылдап, болашақтарына бек сенгендіктің белгілері байқалады. Балаларының белін буып, ақ жол тілеуге келген ата-аналардың да жарқын жүздері бал-бұл жанып тұр.
Салтанатты рәсімге қатысқан Мәдениет және спорт министрі Арыстанбек Мұхамедиұлы Президентіміздің сарабдал саясаты арқасында Қазақстанның абырой беделі асқақтап, халықаралық қоғамдастық мойындарлық биік деңгейге көтерілгенін, мәдениет саласында да аса ірі табыстарға жеткеніне тоқталып, Мемлекет басшысының өнерді өркендетуге үлкен қамқорлық жасап келе жатқанын атап көрсетті. Бүгінгі мереке иелерінің сол еңбекті ақтайтындарына сенім білдірді.
Ал академия ректоры, Ресейдің халық әртісі Алтынай Асылмұратова үлкен толқу үстіндегі шәкірттеріне былайша сәт сапар тіледі. «Сендер үшін бұл ешқашан ұмытылмастай ерекше күн. Бүгін кәсіби сахнаға алғаш рет аяқ басасыздар. Көп нәрсені үйренулеріңіз керек. Ол үшін өз істеріңізге жан-тәндеріңізбен берілгендеріңіз жөн. Оқып-үйренуден әсте жалықпаңыздар. Еңбек ете біліңіздер. Бірде-бір күндеріңізді босқа өткізбеуге тырысыңыздар. Қалаған мамандықтарыңызға адал болыңыздар. Сонда балеттің сиқырлы әлемі есігін айқара ашады. Олай болса, өнердегі сапарларыңызға сәттілік тілеймін», деді Алтынай Әбдуәхимқызы ағынан жарылып.
Шат-шадыман қызыққа толы шараның соңы академия оқушылары мен студенттерінің күшімен дайындалған концерттік бағдарламаға ұласты.
Талғат БАТЫРХАН,
«Егемен Қазақстан»
