Мәслихат хатшысының еңбекақысы мардымсыз екен

Еңбекақының төгілген терге лайық болғаны, еңбектің әділетсіз бағаланғаны да адамдарды үнемі алаңдататын негізгі мәселе. Әрине жұмыстың бәрін ұйымдастырып, барлық жұмыс процесіне жауап беретін бірінші басшының еңбекақысы қол астындағы қызметкерлерінен артық болуы әбден заңды. Бұл логикалық жағынан сенімді, бұлтартпайтын шешім. Алайда бізде осы жазылмаған, бірақ та бұлжымай орындалуға тиісті тәртіп барлық жерде бірдей қолданылмайды екен.   

Жуырда Мәжілістің жалпы отырысында депутат Марат Бопазов Премьер-Министр Б.Сағынтаевтың атына жұрттың бәрін таң қалдырған сенсациялық жаңалығы бар сауал жолдады. Онда былай делінген: «Қазақстан Респуб­ликасы Үкіметінің 2015 жылғы 31 жел­тоқ­сандағы №1158 қаулысына сәйкес «Б» корпусындағы әкімшілік мемлекеттік қыз­мет­керлердің еңбекақылары 30 пайызға өсті. Қазіргі таңда саны 213 адамды құрайтын, барлық деңгейіндегі мәслихат хатшылары аталған қау­лы шеңберіне кірмей қалды. Олар­дың ала­­тын жалақылары мәслихат аппараты қыз­мет­керлерінен төмен болып отыр».
Мәслихаттар жұмысын регламенттеген «Қазақстан Республикасындағы жергілікті мем­лекеттік басқару және өзін-өзі басқару ту­ралы 2001 жылғы 23 қаңтардағы №148 заң­ның 19-бабының 4) тармағында мәс­­ли­хат хатшысы «мәслихат аппаратының қыз­­метiн­е басшылық жасайды, оның қызмет­шiлерiн қыз­метке тағайындайды және қыз­мет­тен босатады» деп нақты жазылған. Демек «хатшы» деген аты болмаса мәслихат хатшысы басшылық лауазымға сайланған адам. Енді осы лауазымды тұлғаның өз қарауындағы қыз­меткерлерден еңбекақыны аз алатынына таңданбай көріңіз. 
Депутат М.Бопазов бұл мәселе 2016 жылы сыйақы берудің айырмасымен түзе­тіліп отырды дейді. Ал 2017 жылы ондай мүмкіндік болмаған. Одан әрі депутат: «2017 жылғы 18 қаңтарда бұл мәселе Қазақстан Республикасы Парламенті Мәжілісінің жалпы отырысында көтерілген болатын, оның барысында Мемлекеттік қызмет істері және сыбайлас жемқорлыққа қарсы іс-қимыл агенттігінің өкілі депутаттық корпусқа бұл мәселенің шешілуі қарастырылуда деп хабар­лады. Ал Ұлттық экономика минис­трлігі атал­ған мәселені білетінін айтып, бірақ мәсе­ленің шешімі 2018 жылға қалдырылғанын жет­кізген», деді депутат. Бірақ депутат мәселені шешу бойынша әлі күнге Үкімет тарапынан ешқандай шара қабылданған жоқ дейді. Демек жаңа жыл­дың бюджетіне мәслихат хатшы­ларының еңбекақысын өсіру шығындары енгізіл­меген. Бұл сол, «жаны ашымастың қа­сын­да басың ауырмасынның» кері сияқты. Өз­дері­нің еңбекақылары жоғары болып, бәріне жетіп тұрған биік лауазымды шенеуніктер мәслихат хатшысы еңбекақысының аз екеніне басын ауыртпайтыны көрініп тұр. Ал егер сол министрлердің өз еңбекақысы қара­мағындағы департамент немесе басқарма басшысынан аз болса, ендігі үлкен дау шығаратын еді. 

Депутат М.Бопазовтың осынау сәйкес­сіз­­дік­ті айтып, Премьер-Министр Б.Сағын­таев­тың атына жолдаған сауалын қолдап 27 депутат қол қойды. Осындай шешімге келген депутаттар жоғарыдағы оқиғаның ешқандай логикаға жатпайтындығына наразылық білдіргендей болды. Үкімет бұл мәселені әділ шешер деген үміт бар.