Ядролық медицина бөлімінің меңгерушісі Айгүл Сәдуақасова ауруханада ем алушылардың өтініші бойынша магнитті-резонансты томография (МРТ) мен компьютерлік томографиядан өткізуді күн сайын, яғни сенбі және жексенбі күндері де жүргізе бастағанын айтады. Өйткені адам ағзасындағы кішкене өзгерісті, мәселен, онкологияны дер кезінде анықтаудың маңызы зор. Біздің құрал-жабдықтарымыз кішігірім өзгерістердің өзін көруге және емді өз уақытында бастауға мүмкіндік береді, дейді ол.
Құрылғанына екі жыл ғана болған медициналық кешен аз уақытта шеберліктерін үнемі жетілдіріп келе жатқан, өзге медициналық мекемелердегі әріптестеріне де үйретіп жүрген кәсіби мамандарының арқасында адамдардың сеніміне ие болды. Ем алушылар Президенттік емхананың уақыт пен қаржыны үнемдей отырып, бір уақытта бірнеше ауруды қатар емдейтінін жоғары бағалайды. Осы орайда аурухана директорының емдеу-диагностикалау жұмыстары бойынша орынбасары Раушан Қарабаеваның айтуынша, әр ай сайын өткізілетін «Менің сүйікті дәрігерім» акциясы аясында жоғары санатты мамандардың қабылдауы, инструментальды және зертханалық зерттеулер құны пациенттерге қолжетімді болу үшін төмендетіліп отыр.
Мәселен, Президенттік ауруханада ең үздік офтальмологиялық орталықтардың бірі жұмыс істейді. Онда тексеруден бастап операцияға дейінгі алдын алу шараларына дейінгі кешенді қызмет түрі көрсетіледі. Осы орталықта дәрігер Ырзық Жарылғасынова көздің торын нығайту әдістемесін енгізіп, оны белсенді түрде пайдаланып келеді. Көз торының ішкі қабығының зақымдануы немесе көру қабілетінің нашарлауы жас ұлғая келе пайда болатын және мінез-құлық себептеріне байланысты әлемнің әрбір екінші тұрғынында кездесетін кесел.
«Хирургиялық нейро және ретинопротекция әдістемесі дегеніміз – көз қабығындағы сұйықтық пен көз алмасы арасындағы кеңістікте дәріліік препараттарды (биореттеуші пептидтер) енгізу. Биоынталандыру үдерісі бір ғана мәрте, жанға батпайтындай жеңіл жүргізіледі. Бағасы да қолжетімді, бірнеше айға ұзармалы тиімділігі де бар. Көздің көруі бір тәуліктен соң жақсара түседі», дейді дәрігер.
Аурухана мамандары диагностикалық зерттеулер мен консультациялар өткізу барысында кепілдендірілген тегін медициналық көмек көлемі шеңберінде стационарлық емді қажет етуші пациенттерді іріктейтінін, ал бұл санатқа енбеген және ерекше күтімді қажет ететін пациенттер ақылы бөлімге жүгіне алатынын айта кеткен абзал.
Думан АНАШ,
«Егемен Қазақстан»
