Жиынды ұйымдастырушылар қатарында жауапты мемлекеттік органдардың өкілдері, қаланың құрметті адамдары, сала мамандары болғанымен, жан-жақты талқылауды университетте қызмет ететін ғалымдарымыз, тіл мамандары, көзі қарақты, көкірегі ояу жастарымыз іліп әкетіп, тұшымды ой-пікірлерін білдірді. Келелі жиынның қорытындысын түзер болсақ, еліміздің Тұңғыш Президенті – Елбасы білім алған, бүгінгі таңда осы құрметті мәртебеге сай білім беріп келе жатқан университет ұжымы мен студент жастардың латын графикасын енгізу мәселесін ықыласпен қабылдағанын атап өткен орынды.
Уақыт сынынан өткен өміршең латын графикасын қазіргі таңда әлем халқының 80 пайызы меңгерген екен. Әлемдік ақпараттың 70 пайызы осы таңбамен таратылатынын, ғылымның тілі, халықаралық терминдер, формулалар да негізінен латын әріптерімен жазылатынын ескерер болсақ, жаңа әліпби біздерге зор мүмкіндіктер туғызады. Мұнымен қоса әлемдік медицина препараттарының атауы түгелімен латын графикасында берілсе, техника, технологиялар, биология, фармация салалары да түгелге жуық осы қаріптермен жазылады. Халықаралық спорт ойындары, олимпиадалық додалар, спортшылардың аты-жөні, ойындар нәтижелері де тек латын графикасында екендігін де көріп-біліп отырмыз.
Тіліміздің жалпы латын қарпіне көшуі туралы ұсынылған соңғы нұсқаны (бір дыбыс – бір әріп) жиынға қатысушылар бірауыздан қолдады. Сонымен қатар ұсыныс ретінде бұл ауқымды да маңызды шара жалпы халықтық сипатта болса екен деген де ойлар айтылды. Бір халық, бір мақсат, бір мүдде бағдарламасында айтылғандай еліміздің тұтастай бұл шараға қатысқаны, оны игеруге атсалысқаны орынды болар еді.
Әлемдік тәжірибелер ескеріле отырып жасалған жаңа әліпби негізінде қазіргі қолданыстағы әліпбиді латын қарпіне көшіруге қатысты ақпараттық-түсіндіру жұмыстарын жүргізу – ең өзекті мәселе. Тілімізді дамытып, оны әлемдік ақпараттық кеңістікке шығарудың негізгі көзі болып табылатын тарихи оқиғадан ешкім де шет қалмауы тиіс, әсіресе, профессорлар-оқытушылар құрамы мен студент жастар қауымы.
Латын графикасындағы жаңа әліпбиді қабылдау – Рухани тәуелсіздік екенін жақсы түсініп келе жатқан елдің сенімі көңіл қуантады.
Ізтілеу АМАНЖОЛ,
медицина ғылымдарының докторы, профессор, кафедра меңгерушісі
Қарағанды облысы
