Суретті түсірген: Талғат ТӘНІБАЕВ
Ол 16 жылдың ішінде 85 марафонға қатысып, 9 мәрте кубок, 29 медаль иеленді. Ендігі арманы – Гиннестің рекордтар кітабына ену. Іле-шала «Алматы туры-2017» халықаралық жарысының 4 дүркін жеңімпазы Алексей Луценко «Вуэльта Испания» велокөпкүндік жарысының бесінші кезеңінде жеңістің ең биік тұғырына көтерілді. «Тур де Франс-2017» таныстырылымына шақырту алды. Жақсы хабардың ізі суымай жатып Ашғабадта өткен Азия ойындарында велошабандоз Артем Захаров тректе жеңімпаз, омниумда күміс, жеңіл атлетші Михаил Литвин 400 метрге жүгіруден қола жүлдегер атанса, балуанымыз Данияр Кәленов алтыннан алқа тақты.
Зілтемірші Айдар Қазовтың айшықты асуы неге тұрады! Оның Тайпэй қаласында әлемнің 142 елінен 7 мыңға жуық спортшы қатысқан студенттердің ХХІХ дүниежүзілік Универсиадасындағы топ жарған зор табысына аймақ басшысы Құмар Ақсақалов та ортақтасып, арнайы қабылдады. Ауыр атлетшіні еліміздің көк байрағын желбіреткен айтулы жеңісімен құттықтап, ақшалай сыйлық табыс етті. «Жеңіс жолы қашанда ауыр. Тайпэйде серпе көтеруден үштікке еніп, жұлқа көтеруде Канада мен Ресей зілтеміршілері бағындыра алмаған 186 килоны көтеріп, алтын тағдыры аса тартысты жағдайда шешілді. Ең мықты қарсыласым – Рио жазғы Олимпиадасының чемпионы Ниджат Рахимов. Алда серпе көтеру нәтижесін жақсарту міндеті тұр», деген болатын БАҚ өкілдеріне берген сұхбатында. Ауыр атлетикадан Қазақстан ұлттық құрамасының бұрынғы кеңесші-бапкері Энвер Түркілеридің «Айдардың бойында Олимпиада чемпионы атануға қажетті қасиеттердің бәрі бар» деген пікірін ескеретін болсақ, жарқын жеңістермен қуантары сөзсіз.
Данияр Кәленов жайлы сөз бөлек. Азия құрлығының кіл мықтылары жиналған бәсекеде балуандар арасынан ол ғана ел қоржынын алтын жүлдемен еселеді. Алғашқы белдесуде боз кілем иесін, яғни түрікменстандық балуанды 5:0 есебімен ұтып, келесі айналымда қытайлықты 8:0 есебімен ойсырата жеңді. Жартылай финалда Өзбекстан намысын қорғаған қандасымыздан айласын асырса, ақтық жекпе-жекте ирандықты қапы қалдырды. Мұның алдында ел чемпионатында қола, Грузиядағы Гран-при жарысында бірінші орын алған болатын.
Ел намысын абыроймен қорғап, мерейін асырған спорт саңлақтарын жуырда өткен марапаттау рәсімінде Түрікменстан жерінде үш жерлесіміздің жеңіс тұғырына көтерілгені атап айтылды.
– Спорт – денсаулықты жақсартатын, саламатты өмір салтын қалыптастыратын, адамдарды біріктіретін, достастыратын маңызды шара. Облысымызда бұл салаға үлкен көңіл бөлініп келеді. Бюджеттен қомақты қаржы қарастырылып, сәулетті нысандар салынуда. Бүгінгі таңда 170 мыңнан астам тұрғын 3 мыңға тарта спорт ғимараттарында жаттығады, дей келіп, Құмар Іргебайұлы, Артем Захаров пен Михаил Литвинге 1 миллион және 500 мың теңге мөлшерінде ақшалай сыйлықты, ал Данияр Кәленовке пәтердің кілтін салтанатты түрде тапсырды.
Олардың бапкерлері де түрлі марапаттарға ие болды.
Өмір ЕСҚАЛИ,
«Егемен Қазақстан»
Солтүстік Қазақстан облысы
