Бұл өзгерістен біз не күтеміз? Жалпы алғанда, латын графикасы қазақ тілінің дыбыстық жүйесін табиғи қалыпқа түсіріп, жасандылыққа ұрынған артикуляциялық базасынан арылтуы тиіс.
Екіншіден, бұрынғы қырық екі әріптің саны қысқарып, жаңадан мақұлданған 32 әріп-дыбыстық әліпбидің ерекшелігі, болашақта жазу сыйымдылығын арттыруға негіз болары анық.
Үшіншіден, жаңа әліпби тіліміздің ұлттық сипатын арттырып, санамызды сілкінтіп, жадымызды жаңғыртып, рухани бодандықтан құтқарудың жолы болар деген үміт бар.
Осы орайда Елбасы өзі бастамашы болған рухани өзгерісті баянды іске асыру үшін арнайы комиссия құруды латын әліпбиіне көшудің кезеңдік бағдарламасын дайындауды Президентінің Әкімшілігіне тапсырыпты. Осындай кемел де келелі іске тек сәттілік тілеуден басқа не айтуға болады.
«Көш жүре түзеледі» дегендей, болашақта латын әліпбиіне бізден бұрын көшкен Түркия, Өзбекстан, Әзербайжан, Түрікменстан секілді түркітілдес елдердің тәжірибесіне сүйене отырып, олардың жіберген қате-кемшіліктерінен сабақ алуымыз қажет.
Мұхтарбай ӨТЕЛБАЕВ,
ҰҒА академигі
