«Саламатты Қазақстан» пойызының бас дәрігері Алтын Мырзахметованың айтуына қарағанда, көп салалы диагостикалық қызметтермен жабдықталған бригада Белоградовка, Қайранкөл, Ақсуат секілді облыс орталығынан шалғай орналасқан елді мекендерге аялдап, науқастардың қаралуына барлық мүмкіндік жасалған. Қайранкөл стансасында 200-ге жуық адам дәрігерлердің қабылдауына жазылған. Әсіресе невропатолог пен кардиологтарға, УЗИ мамандарына өтініш білдірушілер қарасы қалың болған. Сол сияқты педиатрлар да балалардың денсаулығын жіті тексеріп, ем-дом шараларын белгілеп берді. Мониторинг жүргізу барысында солтүстікқазақстандықтардың қан қысымы, жүрек-қан тамырлары, қант диабеті ауруларына көбірек шалдығатыны анықталған.
Пойызда душ кабинасы, дизельді генератор, жылжымалы заманауи құрал-жабдықтар орнатылған. Сондай-ақ ауруы асқынған жандарға шұғыл кеңес беру мақсатында орталық клиникалармен, институттармен байланыс жасау жолдары қарастырылған.
– Аудан, облыс орталықтарына баруға кез келген адамның шамасы келе бермейді. Оның үстіне білікті мамандар да тапшы. Сондықтан осындай тегін медициналық сапарлардың жиі ұйымдастырылғанын қалаймыз, – дейді ауыл тұрғындары.
Өмір ЕСҚАЛИ,
«Егемен Қазақстан»
Солтүстік Қазақстан облысы
