Мұнан кейін Мемлекет басшысының бастамасымен латын әрпіне көшу ұсынылып, қоғамда қызу талқылауға түскен еді. Латын әліпбиінің қай нұсқасын аламыз деген сұрақ ел тұрғындарын бейжай қалдырмағаны анық. Бұл мәселе жөнінде жұмыс тобы құрылып, келіп түскен ұсыныстар мен әліпбидің түрлі нұсқалары қоғамда жан-жақты талқылауға шығарылды. Онда ғалымдар, қоғам қайраткерлері, тілтанушы мамандар өз тарапынан пікірлер білдіріп, ортақ шешімге келді. Енді міне, соңғы нұсқасын бекіту туралы ортақ қорытындыға келіп, Елбасының Жарлығы да шықты. Біз жаңа әліпбиді ендіру туралы өз шешімімізді заңдастырып отырмыз. Бұл ел тарихындағы нақты қадам, рухани жаңғыруымыздағы маңызды белес болғалы отыр.
Тәуелсіздік алғаннан бері жас мемлекет ретінде әлемдік интеграциялық үрдістерге белсенді атсалысып келеміз. Бүгінгі әлемдегі ақпарат пен ғылыми деректердің 70 пайызы латын әрпіндегі мәтіндермен тарайды. Ендеше әлемдегі алдыңғы қатарлы 30 елдің қатарына ену үшін біздің де латын әліпбиіне көшуіміз уақыт талабы дегім келеді.
Қазақстан халқы мен елдегі түрлі қауымдастықтар мен ұйымдар, ғалымдар, шығармашылық адамдары, Қазақстан халқы Ассамблеясы, Қазақстан демократиялық күштер коалициясы Елбасының латын әліпбиіне көшу идеясын қолдайтындығын білдіріп, ол пікірлерін бұқаралық ақпарат құралдарында ашық жариялады.
Латын әліпбиіне көшудің еліміз үшін бірнеше артықшылығы бар. Соның бірі тіл тазалығында. Латынға көшу арқылы тіліміздегі қазіргі жат дыбыстарды таңбалайтын әріптерді қысқартып, қазақ тілінің табиғи таза қалпын сақтауға мүмкіндік аламыз. Сонымен қатар қазақ тілін оқытқан уақытта басы артық таңбаларға қатысты емле, ережелердің қысқаратыны белгілі. Ол мектептен бастап барлық оқу орындарында оқыту үрдісін жеңілдетеді. Уақыт та, қаржы да үнемделеді, қазақ тіліне компьютерлік жаңа технологиялар арқылы халықаралық ақпарат кеңістігіне кірігуге тиімді жолдар ашылады.
Сонымен қатар латын әліпбиіне көшу – қазақ тілінің халықаралық дәрежеге шығуына жол ашады. Бүгінгі компьютерлердің дамыған заманында интернет жүйесінде үстемдік ететін латын әліпбиі екендігі баршамызға белгілі. Барлық дәрі-дәрмек атаулары, технология, математика, физика, химия формулалары, ғылыми терминдер, мамандықтарға қатысты ғылыми әдебиеттер т.б. латын әліпбиімен байланысты екені айдан анық. Яғни, латын әліпбиі бізге жаңалық не болмаса таңсық емес. Оны біз күнделікті өмірде қолданып та жүрміз.
Бүгінде түбі бір түркі елдерінің барлығы латын әрпін қолдануда. Біз өзімізге дейін латын әліпбиіне көшкен түркітектес елдерде болған олқылықтарды жіберіп алмай, олардың тәжірибелерін ескеріп, байыптылықпен, жан-жақты таразылап, ортақ шешіммен жүзеге асыруға тырысып жатырмыз. Бұл оңды қадам.
Мемлекет басшысы атап өткендей, мектеп қабырғасында балаларымыз ағылшын тілін оқып, латын әріптерін онсыз да үйреніп жатыр. Сондықтан, жас буын үшін ешқандай қиындық, кедергілер жоқ деп ойлаймын. Елбасы айтқандай бұл «біздің балаларымыздың болашағы үшін» жасалып отырған қажетті шара. Олай болса болашақ ұрпақты ойлайтын әр азаматтың, әр адамның бұл маңызды шешімді әрі қарай қолдайтынына сенемін.
Латын әліпбиіне көшу туралы Елбасының Жарлыққа қол қоюы тәуелсіз Қазақстан тарихындағы айтулы тарихи оқиғалардың бірі болып отыр. Бұл еліміздің болашақ бағдарын анықтаудағы, рухани жаңғыру жолындағы жасалып отырған маңызды қадам дегім келеді. Мұны «Ауыл» партиясы толық қолдайды.
Әли БЕКТАЕВ,
Парламент Сенатының депутаты,
«Ауыл» халықтық-демократиялық
патриоттық партиясының төрағасы
