«Созвездие талантов» балалар клубындағы ұзартылған топта әлеуметтік аз қамтылған және көпбалалы отбасылардан шыққан балалар қазақ, орыс және ағылшын тілдерін, дүниетану, математика пәндерін оқып, дене шынықтырумен айналысады.
Осындай орталық ашу туралы бастаманы көтерген Абай Құнанбайұлы атындағы Саран гуманитарлық-техникалық колледжінің түлектері.
– Біз «Zhas Project» жобасы туралы естідік және ол ата-аналары репетиторларға төлей алмайтын отбасылардың балалары үшін тегін курстар ашу үшін жақсы мүмкіндік деп шештік, – дейді осы орталықтың негізін қалаушылардың бірі Юлия Захарова. – Біз жоба жетекшілеріне бізге ғимарат беру мен қаржылай көмектесу туралы хат жолдадық. Олар келісті.
Балалармен жұмысты бастамас бұрын ұйымдастырушылар жоба аясында Астанада ұйымдастырылған арнайы курстан өткен. Сондай-ақ оларға тәлімгер белгіленген, ол қыздарға түрлі мәселелер бойынша кеңес беріп, қиын жағдайларда көмектеседі.
Бүгінде орталықта аз қамтылған отбасылардан 20 бала білім алуда.
– Біз мектептерде насихат жұмыстарын жүргіздік, әлеуметтік аз қамтылған және көпбалалы отбасылардан шыққан оқушылардың тізімін алдық, – деп есіне түсірді Юлия Захарова. – Бастапқыда біразы бізге сенбеді, біздің қаржымыз жоқ деді, олар біз оқулар аяқталған соң ақы талап етеді деп ойлады. Алайда, уақыт өте келе бізге балаларын алып келе бастады, барлығы да тегін әрі шын екеніне көздері жетті. Қазір ондай сенімсіздік жоқ.
Жоба Саран қаласында биылғы жылдың шілде айында іске асырыла бастады. Егер де олар алты айда, яғни желтоқсан айына дейін өздерінің қажетті әрі пайдалы екенін дәлелдесе, онда ұйымдастырушыларға жұмыстарын жалғастыру мүмкіндігі беріледі.
Жастар корпусын дамыту жобасы – бұл Халықаралық қайта құру және даму банкі мен Білім және ғылым министрлігінің бірлескен жобасы. Жобаның мақсаты – жастарды, әсіресе осал жастар тобын қоғамдастық өміріне және де қоғамдастық игілігі үшін пайдалы қоғамдық қызметтерге тарту арқылы өмірлік қажетті тәжірибелерді дамыту.
Жоба сынақ түрінде төрт облыста жүзеге асырылып отыр. Павлодар, Қарағанды, Алматы және Оңтүстік Қазақстан облыстарында аталмыш орталықтар өз жұмыстарын жемісті атқарып жатыр деуге толық негіз бар.
Жобаға сай басымдық еш жерде оқымайтын, жұмыс істемейтін жастарға, жұмыс жасайтын, алайда әлеуметтік жағдайы төмен жастарға беріледі.
Мирас АСАН,
«Егемен Қазақстан»
Қарағанды облысы
