Кеше Бейбітшілік және келісім сарайында ХІV халықаралық «Шабыт» шығармашыл жастар фестивалі салтанатты жағдайда ашылды. Бір аптаға созылатын өнер сайысының ерекшелігі – оған шетелдерден де талантты жастар қатысуда.
Ел Тәуелсіздігінің 20 жылында жас мемлекетіміздің экономикасы ғана өрлеп қоймай, әлеуметтік-мәдени салаларда да ауыз толтырып айтарлықтай елеулі оқиғалар болуда. Соның бірсыпырасы елорда тынысымен тығыз байланысты десек, артық айтқандық емес. Әсіресе, соңғы жылдары жас түлектерге рухани қолдау көрсету мақсатында көптеген сайыстардың өте бастағаны көңіл марқайтады. Алайда солардың арасында мәдениет пен өнердің келешегіне даңғыл жол ашуда «Шабыттың» орны қашанда басқаларынан биік тұратыны сөзсіз. Сонау бір кездерге үңілсек, оның «Жігер» деп аталғаны мәлім. Ол сол уақыттағы ел жастарының жігерін жануда, бұлақ көзін ашуда көп іс тындырса, о заман мен бұ заманның айырмашылығы жер мен көктей еді. Бүгінде талап ондағыдан мүлде басқаша, көптеген өнер бәсекелері халықаралық сипат алуда. Ауқымының осылай кеңеюінің арқасында жылдан-жылға бұл сайысқа қатысушылардың саны да еселене түсуде. «Шабыт» фестивалінің жүлдесі үшін емес, мұнда өзінің өнерін сынап көруді биік мәртебе санайтын шетелдік қонақтардың биыл қарасы аз көрінбейді. Олар бір-бірімен ең үздік әдеби шығармалар, бейнелеу өнері, эстрада жанры, халық музыкасы мен классикалық музыка номинациялары бойынша бақ сынаспақ.
Қазылар алқасының құрамына енген мәдениет пен өнердің тарландары да бір-бір саланың нағыз майталмандары дерсің. Олардың арасында белгілі ақын Фариза Оңғарсынова, дүлдүл әнші Қайрат Байбосынов, Италиядағы Полинни Чезаре атындағы консерваторияның профессоры Пьерлуиджи Дестра, Бразилиядағы Блуменау камералық оркестрінің бас дирижері Даниель Бортолосси сияқты тағы да басқа тұлғалар бар. Тәуелсіздік тойы қарсаңындағы тартулардың ішінде бұл шараның қызылды-жасылды сыйлары аз болмайтын секілді.
Нұрзада КҮМІСБЕК.