Лезде әзір болатын кеспенің жасалу жолы да қарапайым. Тек бір артықшылығы, жұмысты толық озық технология атқарады. Алдымен қамыр иленіп, сосын жазылады. Одан әрі будан өтіп, кептіріледі. Содан соң бөліктерге бөлініп, дәмдеуіштерімен бірге қапталып, қорапқа салынады. Міне, сатылымға дайын. Көзіміз көргендей, кәсіпорындағы бұл процесс жалпы 15-ақ минутқа созылады.
Шаруаны қолға алған – «KazBrand» кәсіпорны. ЖШС бас директоры Алмаз Зариповтің айтуынша, комбинат алдымен кеспе шығаруды бастады, алдағы уақытта осы өнім түрінің ассортиментін кеңейтіп, түрлі тұздықтар мен дәмдеуіштер өндіруді жоспарлап отыр. Осылайша Қытай, Ресей, Корея мемлекеттерінен келетін импортты ығыстырмақ. Кондитерлік өнімдерді де өндіру – кәсіпорын мақсаты. Себебі қазіргі таңда Еуропада шығатын үлкен кондитерлік цехпен келісім жасалған. Олар технологияларымен бөлісіп, бізді құрылғылармен қамтамасыз етуге мүмкіндік жасайды.
«Бізде кеспенің екі бренді бар: «Кеспебай» және «Bastoo». «Кеспебай» – отандық бағытқа арналған, бағасы шетелдік өнімдерге қарағанда арзанырақ. «Bastoo» – экспортқа шығаруға жоспарланған өнім. Енді осы тауарларымызбен Қазақстан нарығын жаулауға әзірміз. Қалай жаулаймыз? Біріншіден, біз бірегей рецепт әзірледік. Екіншіден, өнімнің бағасы бәсекеге қабілетті болады», дейді ЖШС директоры. Кеспе кәсіпорыннан 97 теңгеге шығады екен. Ал сауда орындарындағы бағасы шамамен 130-135 теңгенің көлемінде болады. Таза салмағы – 90 грамм, қоспаларымен – 100 грамм.
Кәсіпорын басшысының айтуынша, өнімнің құрамында ешқандай химиялық, зиянды қоспа жоқ, 100 пайыз табиғи өнім. «Елімізде бұған дейін отандық тез дайындалатын кеспелер шығарылмаған. Базар сөрелерінде тек шетелдік өнімдер толып тұр. Қазақстанда өнімді дайындауға қажетті ұн да, тұз да, тағы басқа қоспалар да жеткілікті. Сондықтан неге өзіміздің отандық өнімді шығармасқа деген ой келді? Осы жылы 5 айдың ішінде мамандарды жинап, оқыттық. Сөйтіп тамыз айынан бастап жұмысқа кірістік. Ай сайын 3-6 миллионға дейін кеспе шығарсақ, осы көрсеткішті жылына 30-60 миллионға дейін жеткізуді көздеп отырмыз», деген Алмаз Зарипов кеспенің сапасы таза, денсаулыққа зияны жоқ екенін айтты. Жақында өнім Қазақстанның барлық сауда дүңгіршектеріне шығарылады. Осы айдың соңында алғашқы 3 млн дана кеспе сауда айналымына бағытталмақ.
Кәсіпорын директоры келешекте тәулік бойы жұмыс істейтіндерін айтты. Дегенмен, қазір білікті мамандар тапшылығынан жұмыс тек бір ауысымда ғана атқарылуда. «Бізге жұмысқа орналасқысы келгендердің барлығын қабылдаймыз. Орташа жалақы 120-180 мың теңгені құрайды. Қазіргі таңда 27 бос орын бар», дейді ол. Мекемеге инженерлер, технологтар, операторлар, қаптағышпен айналысатын қызметкерлер қажет екен. Сондай-ақ олар тәжірибесі жоқ мамандарды да оқытуға дайын.
«KazBrand» кәсіпорнына «ҚазАгроҚаржы» АҚ желісі бойынша 900 млн теңгеден астам қаражат жұмсалған. АҚ кредиттеу және лизинг басқармасының директоры Бауыржан Сәбитовтің айтуынша, бұл жоба 2014 жылдан бері қаржыландырылып келеді. Биылғы наурызда пайдалануға енгізілді. Сондай-ақ жұмсалған қаржының жалпы көлемі 1 млрд 233 млн теңге болса, соның 981 млн теңгесін «ҚазАгроҚаржы» мекемесі құйған. «Жобаны қаржыландырмас бұрын біз оның тартымдылығына, тиімділігіне мән береміз. Экономикалық қана емес, технологиялық әлеуетін де сараптаймыз. Бұл – өңдеуші кәсіпорын. Ұн – отандық, дәмдеуіштері әзірге шетелден жеткізіледі. Көп ұзамай оны да өзімізде шығарамыз. Биыл республика бойынша қайта өңдеу картасы жасақталды. Оған 435 кәсіпорын енді. «KazBrand» компаниясы соның құрамында», деді Б.Сәбитов.
Мамандардың сөздерінен ұққанымыздай, болашақта жедел дайындалатын тағам түрлері кеңейе түспек. Тек Қазақстанда жасалған өнімді таңдау – тұтынушының құзырында.
Асхат РАЙҚҰЛ,
«Егемен Қазақстан»
