ҮКІМЕТ «Егемен Қазақстанның» апталық қосымшасы
![Үкімет үлкен](http://old.egemen.kz/2011img/%D2%AE%D0%BA%D1%96%D0%BC%D0%B5%D1%82-%D2%AF%D0%BB%D0%BA%D0%B5%D0%BD14.jpeg)
Биылғы жылдың басында «Қамқор Менеджмент» ЖШС басшылығы «Агромашхолдинг» ЖШҚ-мен бірлесе отырып, Қазақстандағы «Енисей-Қамқор» комбайнын құрастыру бөлімшесінің ашылу рәсімін өткізген болатын. Отандық агроөнеркәсіп кешені саласындағы аса маңызды инновациялық жаңалықтардың бірі ретінде қабылданған осынау сәтті қадам өзінің игі жалғасын тауып, үстіміздегі жылдың сәуір айында Жамбыл облысы мен Шу ауданы әкімдіктерінің қолдауымен республикамыздың аумағында құрастырылған «Енисей-Қамқор-1200» комбайнының ресми тұсаукесері ұйымдастырылды.
2011 жылдың сәуірінен қыркүйек айына дейін «Енисей-Қамқор-1200» астық жинаушы комбайнның 49 данасы жасалынып, оның 40-ы биылғы орақ науқанында пайдаланылды. Осылайша бұл комбайндар Қазақстан Республикасында қолданылып жүрген стандарттау жүйесіне сәйкес сертификаттау сынағынан сәтті өтті. Бұдан басқа аталған комбайнға СТ-КZ форматынан өту сертификаты да берілді.
2012 жылы әртүрлі модификациялармен жарақтандырылған комбайндардың бірнеше түрлерінің 200 данасын құрастырып, пайдалануға беру көзделінуде. Мұның өзі жергілікті жерлерде жұмыс орындарын көбейтумен қатар, Қазақстанның әлеуметтік-экономикалық дамуына да едәуір үлес болып табылары сөзсіз. Өйткені, комбайндарды өз еліміздің аумағында құрастыру ауылшаруашылық техникаларының өзіндік құнын біршама төмендететіні белгілі.
![041111-18](http://old.egemen.kz/2011img/041111-18.jpg)
Жақында ғана Астана қаласындағы «Көрме» орталығында ашылған «ҚазАгро-2011» және «ҚазФерма-2011» халықаралық ауыл шаруашылығы және азық-түлік өнеркәсібі көрмесінің аясында «Агромаш-Қамқор-4121» комбайнының жаңа үлгісі келушілерге таныстырылғаны жұртшылыққа белгілі. 4-сыныпты өздігінен жүретін бұл астық орушы комбайн дәнді дақылдарды тікелей және бөліп оруға арналған. Жаңа үлгідегі ауылшаруашылық техникасы егіні бітік өскен алқаптарда да, сондай-ақ ылғалды жерлерде де дән оруда таптырмайтын құрал. Жаңа комбайн «Тракторлар зауыты» концерні тобына кіретін Краснояр комбайн зауыты конструкторларының көп жылдар бойғы ізденістерінің нәтижесі болып табылады. Биыл бұл комбайндар Ақмола және Солтүстік Қазақстан облыстарындағы астық жинау науқанында диқандардың орынды ризашылығына ие болды. Көрмеге келген шаруашылық басшылары бұл туралы жарыса пікір білдіріп, жаңа комбайндардың озық жетістіктерін тамсана әңгімелегендері бұған нақты дәлел.
Көрме аясында ұйымдастырылған жаңа комбайнның таныстырылымында Премьер-Министрдің бірінші орынбасары Ө.Шөкеев, Ауыл шаруашылығы министрі А.Мамытбеков, Ауыл шаруашылығы вице-министрі М.Төлебаевтар жаңа техника туралы өз пікірлерін айтып, комбайнды құрастыру жұмыстарына «ақ жол» тіледі. Олар өз сөзінде мұның өзі Мемлекет басшысы Н.Ә. Назарбаевтың отандық ауылшаруашылық машиналарын құрастыруды дамыту туралы тапсырмаларын іс жүзіне асырудың тікелей көрінісі екенін атап өтті. Сондай-ақ, «Агромаш-Қамқор-4121» комбайнының техникалық ерекшеліктерімен жақынырақ танысқан құрамында Премьер-Министрдің бірінші орынбасары мен Ауыл шаруашылығы министрі бар Үкімет делегациясы жаңа техниканы құрастырудың келешектегі дамуы мен оларды ауылшаруашылық тауар өндірушілерінің пайдалану мүмкіндіктері туралы кеңінен ой бөлісті. Премьер-Министрдің бірінші орынбасары Ө.Шөкеев отандық ауылшаруашылық техникалары өндірісін дамыту мен өндіріске жаңа технологиялық шешімдер енгізудің маңыздылығын ерекше атап өтті.
Халықаралық көрмеге келушілер мен қатысушылар жаңа комбайнды аса қызығушылықпен тамашалап, оңды пікірлерін білдіруде.
Қазақстанның астықты алқаптарында «Енисей-Қамқор-1200» комбайндары дала кемесіне айналып, ел ризығын төкпей-шашпай жинауға жаппай атсалысатын күн де алыс емес.
Қорғанбек АМАНЖОЛ.