Жаңа аншлагтар қорап тәрізді жасалған, онда көше атауы мен үйдің нөмірі жазылған. Олардың барлығы жарықтандырылған. Маңдайшалардың біразы күн батареясынан қуаттандырылады, ал қалғаны электр жүйелеріне қосылған.
Жаңа маңдайшалар тек тұрғын үйлерде ғана емес, сондай-ақ мемлекеттік мекемелерде, шағын және орта бизнес нысандарында да орнатылады. Бүгінде Ә.Әлиханов көшесі бойындағы ғимараттарға оларды орнату жұмыстары аяқталған.
– Қазыбек би ауданында жалпы сомасы 35 000 000 теңгеге барлығы осындай 1 521 маңдайша орнатылатын болады, – дейді Қарағанды облысы әкімдігінің жоспарлау және абаттандыру бөлімінің жетекшісі Ербол Нукич. – Әзірге мұндай аншлагтар тек Астанада ғана бар. Енді Қарағандыда болады.
Жаңа нұсқаулықтарда QR-коды бар, оны смартфонның көмегімен оқуға болады. Ол арқылы сіз сайттағы парақшаға кіресіз, ол жерде ғимараттың пошталық индексі көрсетілген. Сонымен қатар онда бірнеше бөлім бар, болашақта оларда ғимаратқа кімдер қызмет көрсететіні: ПИК, электриктер, сантехниктер туралы мәліметтер орналастырылады. Сол жерден аталмыш үйге қай мекемелердің қызмет көрсететінін білуге болады: емхана, балабақша, мектеп және т.б. Бұл ақпараттарды сәулет бөлімімен келіскеннен соң ПИК өкілдері толтырып отырады.
Болашақта Октябрь ауданында да дәл осындай 2 326 жаңа маңдайша орнатылмақ. Олардың 2090-ы тұрғын үйлерде, 236-сы мемлекетік мекемелер мен шағын және орта бизнес нысандарында орнатылады. Ол үшін 17 465 000 теңге жұмсалмақ.
Мирас АСАН,
«Егемен Қазақстан»
Қарағанды облысы
