Сәбина Әзімбаева байқау шартына орай келер жылы 18 жасқа толғанда ғана байқауға қатыса алады. Жас шамасына қойылған талаптарға байланысты арулардың орындары ауыстырылды.
Бастапқыда «Әлем аруы» додасы 2018 жылдың қаңтарында Филиппинде өткізіледі деп жоспарланған еді. Соңғы сәттерде жарыс биылғы 26 қарашада Лас-Вегаста өткізіледі деген шешім қабылданды.
Сол сияқты «Қазақстан аруы-2016» атанған қызылордалық Гүлбану Әзімханова да Қазақстан атынан Қытайдың Санья қаласында өткен әлемдік сұлулық байқауында жүргенін хабарлаған болатынбыз.
Ал Кәмила қатысатын «Әлем аруы» (MissUniverse) – жыл сайын өткізілетін сұлулық жарысы. Бұл әлемдегі ең беделді сұлулық байқауларының бірі. Сонымен байқауда бағы тасып, сұлулық тәжін киген жеңімпаз қызбен жылдық келісімшарт жасалады. Ол ару қайырымдылық және жарнамалық мақсатта бүкіл әлемді аралап шығады. Өткен жылы «Әлем аруы-2016» атағын франциялық Ирис Миттенер жеңіп алғаны аян.
Ал Кәмила Әсілова республикалық Эстрада-цирк колледжін хореограф мамандығы бойынша тәмамдаған. Өзінің би студиясын ашуды армандайтын ару Қазақстан атынан осындай ауқымды байқауға қатысу бақытына ие болғанына, әрине қуанышты.
– Бұл менің бала күнгі арманым болатын. Ата-анама әлемдік байқауға баратынымды айтқанымда, олар да қуанып, мені мақтан тұтатындарын білдірді. Анам кішкентай кезімде «Арман-тілектер картасын» салғанымды, сол жердегі арманымның бірі сұлулық байқауымен байланысты болғанын есіме түсірді. Армандар орындалады, – дейді көрікті Кәмила.
Қазір бойжеткен үлкен сынақтарға толы сапарға дайындалып жатыр. Кәмилаға «Қазақстан аруы-2007» байқауының жеңімпазы Альфина Насырова көмектесіп жүр. Альфинаның халықаралық байқауларға қатысуда айтарлықтай тәжірибесі бар. Ол «Әлем аруы-2008» байқауында топ жарған үздік 15 арудың қатарына енгенін ұмытпағандар табылар.
«Альфина маған барынша көмектесіп жатыр. Кеңесін аямайды, өзімді қалай ұстауым керектігін үйретеді. Күнде сабақ аламын, киім өлшейміз, ұсақ-түйектерге дейін таңдаймыз, талқылаймыз. Мен оған өте ризамын», деді тілеулестеріне Кәмила.
Айнаш ЕСАЛИ,
«Егемен Қазақстан»
АЛМАТЫ
