Қазақстан • 15 Қараша, 2017

«Ақтөбе – Атырау» автомобиль жолы қайта жөнделеді

131 реткөрсетілді

Республикамыздың батыс өңірінде мемлекеттік «Нұрлы жол» бағдарламасына сәйкес тағы бір ірі жоба қолға алынды. Бұл бірінші кезекте сонау кеңестік дәуірде алпысыншы жылдардың аяқ кезінде салынған «Ақтөбе – Атырау» автомобиль жолын қалпына келтіруді көздейді. 

Содан бері жолдың бұл бөлігіне күрделі жөндеу жұмыстары жүр­гізілмепті. Осының салдарынан қазіргі жай-күйі өте мүшкіл деуге бола­ды.

«Нұрлы жол» бағдарламасы бо­йынша басталған инновациялық маңызы жоғары жобаның ауқымын тек бір ғана Ақтөбе – Атырау аралы­ғымен шектей салуға болмайды. Бұл автожол құрылысы Ресейдің оң­түстік бөлігінде орналасқан Ас­трахань қаласын жалғайтын магис­тральға барып қосылмақ. Бұдан әрі Орталық Азия мен Парсы шыға­нағы елдеріне шығуға да жаңа мүм­кіндіктер ашылады. Сонымен бірге «Нұрлы жол» арқылы бел­гіленген жоба агломерациялық ай­мақтан Маңғыстау бағытына дейінгі автожолды да жалғастыра алады. 

«Ірі мемлекеттер арасындағы өз­ара экономикалық ынтымақтастық пен қарым-қатынастар тұрғысынан қарастырғанда, аталған ауқымды құрылыс Қазақстанның Қытаймен, Ресеймен және Батыс Еуропа ел­де­рімен арасындағы тауар­ тран­зитінің көлемін 2-3 есе өсіруге мүмкіндік береді», деп мәлімдеді Ин­вестициялар және даму ми­нистрлігі Автомобиль жолдары ко­ми­­тетінің төрағасы Мереке Пі­шембаев. «Бұған қоса, аталған жо­баның әлеуметтік-тұрмыстық байланыстар мен қарым-қатынастар мәселесіндегі орны да айрықша. Яғни жөнделген жол жолаушылар легінің өсе түсуіне де қолайлы жағ­дайлар туғызады», деді ол одан әрі.

«Нұрлы жол» бағдарламасының шапағаты аймақтардағы жергілікті кәсіпкерлік пен шағын және орташа бизнесті дамытуға да тиетіні бел­гілі болып отыр. Бір сөзбен айтқанда, өңірлер арқылы өтетін жолдардың дамуы мен құрылысы жергілікті азаматтарға кемпинг, автосервис және өзге де демалу мен тамақтандыру орындарын са­лып, табыс табуға мүмкіндік бере­ді. Аталған автомобиль жолына күр­­делі жөндеу жүргізу барысын­да 2000-нан астам адам жаңа жұ­мыс орындарына тартылады деп кү­тілуде. Олардың 90 пайызын жер­гілікті тұрғындар құрамақ. Құрылыс жұмыстарына Түркия, Әзербайжан және Италия елдерінің компаниялары қатыспақ. 

Инвестициялар және даму ми­нис­трлігі Автомобиль жолдары­ ко­­ми­тетінің деректеріне сү­йен­­­­сек, алғашқы кезектегі «Ақтөбе – Аты­рау» жол бөлігін қай­та қалпына кел­тіруге Азия даму банкі, Ислам даму банкі се­кілді халықаралық қаржы инсти­тут­тарының қаражаттары тар­тыл­мақ. Оның жалпы сомасы­ 147 мил­­лиард теңгені құрайды. Тағы бір жағымды жайт, жоғарыда атал­ған елдердің компаниялары­ өңірдегі атқарушы билікпен жасал­ған өзара келісімдерге сәйкес құ­ры­лыс пен қалпына келтіру жұ­мыстарына жер­гілікті құрылыс индус­трия­сының материалдары мен ең­бек ре­сурс­тарын пайдаланбақ. Бұл бюд­жетке түсетін қосымша салымдар мен жаңа жұмыс орындары көбейеді де­ген сөз. 

Аталған жобаның белгіленген кес­те мен мерзімге сай орындал­уын бақылау жүйесі да қоса ой­лас­­тырылған. Құрылыс сапасын қадағалау ісі де осы қатарда тұр. Бұл міндет «ҚазАвтоЖол» ҰК» АҚ мен кореялық «Донсунг» ком­паниясының еншісіне тиіп отыр. Күрделі құрылыс пен қалпына кел­тіру жұмыстары 2020 жылға дейін аяқ­талуға тиіс.

Темір ҚҰСАЙЫН,
«Егемен Қазақстан»

АҚТӨБЕ

Баннер
Соңғы жаңалықтар

Қарсыласы қарымды

Кәсіпқой бокс • Кеше

Тандыр наннан шеге шықты

Аймақтар • Кеше

«Jastar kerýeni» жолға шығады

Аймақтар • Кеше

Майдан тудырған сөз

Руханият • Кеше

Ұқсас жаңалықтар