Бизнес • 15 Қараша, 2017

Қиярды брендке айналдырған ауыл

736 рет
көрсетілді
3 мин
оқу үшін

Облыс орталығына қарайтын Павлодар ауылының халқы жылыжайда өсірген көкөніс, бау-бақша өнімдерімен өздерін де, өзге ауылдарды, қаланы да қамтамасыз етуде. Ауыл маңында игерілмей жатқан 60 гектар жер көкөніс өсуіруші тұрғындарға берілген. Ауыл әкімі Аждар Жүсіповтің айтуынша, 1 отбасына 1 гектар тиесілі, ол аздық етсе жалға берілетін жер көлемі ұлғайтылады. 

Қиярды брендке айналдырған ауыл

Тұрғындар аулаларына жылыжай жасап алған. Ауылдағы 370 жылыжайда қияр өсіріледі. Гүл егуді, басқа да көкөніс түрле­рін өсіруді қолға алған тұрғындар да бар. 

– Көкөніс өсірудің ең тиімді­ жолы – жылыжай шаруашы­лығын дамыту, өйткені сұраныс жоғары. Сондықтан шағын ғана жылыжайдың өнімдерін са­тып тапқан табыс бір отбасын асырауға жетеді,– дейді  жер­гілікті кәсіпкер Оксана Воронина.

Ауылда үлкенді-кішілі 600 жылыжай, 47 жеке кәсіпкерлік нысаны жұмыс жасайды.­ Олардың қатарында 24 дүкен, дәріхана, тіс емханасы бар. Бүгінде тігін цехы мен жекеменшік балабақша ашуға ниеттеніп отырғандар жеткілікті.

Рүстем Құсановтың «Құса­нов»­ жеке шаруашылығы бас­қа­лар­ға үлгі боларлықтай. Шаруа­шылық 7 жылдан бері қияр, қызанақ өсіріп, қолжетімді баға­мен саудалайды. Жылыжай салып, ұңғыма қазып, суару жүйе­сін құру үшін 7 миллион теңгедей қаржы жұмсалған. Ауылдықтарға да жұмыс бар, «Құсанов» жылыжайында еңбек етеді. Шаруашылықтың 6 гектар жерінің, 2 гектарына – қырыққабат, 1,5 гектарына – қызанақ, 1,5 гектарға қияр егіледі. Биыл қарбыз өсіре бастады. Келер жылы гол­ланд жүгерісін өсірмекші. Шар­уа­шылық тамшылатып суару әдісін қолданады. 

Ал жылыжай шаруашылығын дамыту үшін кәсіпкер Руслан Тұрсынханов болса шетелдік инновацияларға назар аударыпты. Енді күн энергиясы және жел генераторларының қуа­ты арқылы жылыжайының жұмысын жүргізбекші. Солтүс­тіктің қақаған суығына қарамай-ақ, қияр, қызанақ өсірудің инно­вациялық идея­сы бар көрінеді.

Ауыл әкімінің айтуынша, ауылда «ЭКСПО» деп аталатын базар ашылды. Жергілікті халық енді өнімдерін осы базарда сата алады. Көкөніс өсірушілердің өнімдерін өткізуге осылай жағдай жасалып отыр. Бұрынғыдай облыс орталығындағы базарларға өткізіп әуреленбейді. 
Кәсіпкер Оксана Воронина­ның жылыжайында қиярдың «Маша» , «Герман», «Линара» деп аталатын түрлері бар. Ал жал­пы, жылыжайларда қиярдың 15 түрлі сорты өсіріледі екен. Ауыл­дағы 600 жылыжайдан мау­­сым сайын 278 тонна өнім жиналады. 

– Қияр біздің ауылдың бренді. Экологиялық таза өнім. Біздің қияр дәмді, – дейді ауыл халқы.

Фарида БЫҚАЙ,
«Егемен Қазақстан» 

ПАВЛОДАР