Еске сала кетейік, 2015 жылғы 11 ақпанда Нұрсұлтан Назарбаев Үкіметтің кеңейтілген отырысында азаматтардың ипотекалық қарыздарын қайта реттеу жөнінде тапсырма берген болатын. Соған сәйкес, Үкімет пен Ұлттық банк тарапынан 130 миллиард теңге бөлініп, бүгінде 22 мыңға жуық азамат өз баспаналарын сақтап қалуға мүмкіндік алды. Осы мәселенің оң шешімін тауып, іске асуына орай еліміздің бірнеше өңірінен хат жазған азаматтар Мемлекет басшысына зор ризашылықтарын жеткізген.
Атап айтқанда, Алматы қаласының тұрғыны Бақыт Уақасова Елбасына мемлекеттік бағдарлама аясында ипотекалық несие бойынша белгіленген пайызды азайтып, әлеуметтік жағдайы төмен отбасыларына көмек көрсеткені үшін алғыс білдірген. Ал Шымкент қаласынан Әлия Қадырқұлова: «Сіз ипотека арқылы сатып алынған жалғыз баспананы тартып алмау, несиені қайта қаржыландыру, мүмкіндігі шектеулі адамдарға жеңілдіктер жасау туралы тапсырма беріп, қарапайым халықтың ризашылығына бөлендіңіз. Әрі қарай да халықтың әлеуметтік жағдайын жақсартып, қамқор болатыныңызға сенімдімін», деп жазған.
Алматы облысының Қарасай ауданындағы Іргелі ауылының тұрғыны Мәрзия Оспанова: «Ипотека арқылы алған баспанамызды отбасымызда сақтап қалуға мүмкіндік туғызғаныңыз үшін ризашылығымызды жеткізгіміз келеді. Халқыңыздың жағдайын жасап, қиыншылықта қолұшын бергеніңіз үшін алғысымыз шексіз», деген ыстық ықыласын жолдаған.
Хат иелері Нұрсұлтан Назарбаевқа зор денсаулық пен ұзақ ғұмыр, сондай-ақ еліміздің өсіп-өркендеуі жолындағы еңбегіне мол табыс тілеген. Мемлекет басшысы өз атына келіп түскен хаттармен мұқият танысып, жылы лебіздерін білдірген азаматтардың барлығына алғыс айтты.
