Қазан қаласында өткен «CINEMA CAMP-2017» халықаралық кинофестиваліне Иран, Түркия, Ресей, Иордания, Қазақстан, Франция, Қырғызстан, Грузия, Украина, Египет, Армения, Беларусь, Эстония елдерінен 350 қатысушы өтініш білдірген.
«Lion Productions» кинокомпаниясы мен халықаралық «Жас режиссер» киномектебі бірлесіп ұйымдастырған байқауға біздің еліміздің атынан қатысқан Ақбөбек Төлжан – «Хабар» агенттігінде режиссер болып еңбек ететін жас.
Ол «Ең үздік студенттік фильм» аталымы бойынша жеңімпаз атанған «Отпан тау» тарихи қысқа метражды деректі фильмінде Отпан тау тарихынан бастап, бүгінгі тарихи-мәдени кешеннің қызметін көрсетіп, жас ұрпақты тарихи-рухани мұраларды қастерлеуге шақырады. Тарихи деректі фильмдер түсіруді армандайтын Ақбөбек Нұрбаулықызы тырнақалды туындысының Татарстанда топ жарғанына қуанышты.
