– Жастарымыз жаңа өмірге осындай әсем сарайда қадам бассын деген ниетпен Салтанат сарайын тұрғызып отырмыз. Бұл істі қолға алмас бұрын Елбасының рұқсатын сұрап, батасын алған едім. Облысымызда әлі талай зәулім ғимараттар салынады. Келер жылы театрдың жаңа ғимаратын, жүзу бассейнін ашамыз. Мұның игілігін халқымыз, жастарымыз көреді. Ал бүгінгі бас қосып отырған жастарға бақыт тілеймін, әрдайым бір-біріңді сыйлап, қолдап, қорғап жүріңдер. Сонда бәрі жақсы болады. Бүгін алтын, лағыл тойларын өткізуге келген жұптардың жолын берсін деймін. Қосақтарыңмен қоса ағарып, көп балалы болып, қазақтың санын көбейте беріңдер. Қарияларымызға әрдайым жастарымызға үлгі-өнеге болып, немере-шөберелеріңіздің қызығын көріңіздер демекпін, – деп тілегін арнаған облыс әкімі Амандық Баталовтың құттықтауынан кейін, Салтанат сарайының тұсаукесерімен бірге некесі қиылған жастарға неке куәлігі тапсырылды.
Екіншісі – 4,5 мың шаршы метрді алып жатқан Көрме кешені. Құрылысына бюджеттен 1,3 млрд теңге қаржы жұмсалыпты. Сыртқы көрінісі алыстан көз тартатын нысанға жұмсалған отандық және шетелдік материалдардың сапасы да жоғары деңгейде. Облыс орталығының шырайын кіргізіп, ажарын аша түсетін құрылыс алдағы күнде қала тұрғындары мен қонақтарының ең көп атбасын бұрар орталығына айналады деген сенім бар.
Лентасы қиылып, есігі ашылған салтанатты жиынды өңір басшысы Амандық Баталов құттықтау сөзімен бастады:
– Облыстағы экономика, ауыл шаруашылығы, медицина, білім, мәдениет, тағы да басқа саладағы озық технологиялар мен дүниелерді, өнер туындыларын халыққа көрсету, насихаттау, сол арқылы болашақ ұрпаққа сара жол салу мақсатында бой көтерген ғимараттың табысты бастамаларға жол ашатынына сенімдімін. Мұнда қалалық, облыстық, республикалық, тіпті халықаралық шараларды да өткізуге болады. Осы ғимаратты ашу арқылы көрме қызметінің жаңа мүмкіндіктеріне жол ашумен қатар, өзімізде өндірілетін тауарлар мен қызметтерді кешен қабырғасында көпшілікке ұсыну арқылы өңіріміздің инвестициялық тартымдылығын да еселей аламыз. Қаламыз мұндай Көрме павильонымен мақтана алатынына сенімдімін, – деді әкім.
Сәулетті ғимараттың құрылысын жүргізген – «Стройсервис-97» ЖШС. Ғимарат қаланың кіреберісінде орналасқандықтан, қалаға келушілерге ә дегеннен жақсы әсер қалдыру жағына баса назар аударылған. Көрме кешенін аралап шыққан басшылық тарапы сәулетті көрінісіне де, құрылыстың сапасына да жоғары баға берді.
Бұл ғимаратқа алдағы уақытта облыстық «Атамекен» кәсіпкерлер палатасы, кәсіпкерлерге қызмет көрсету орталығы, «Бизнес-мектеп», бизнес-инкубатор сияқты мекемелер орналасады. Бұл мекемелер әу бастағы жоспарға сәйкес Жетісу өңірін көркейту, қала халқын кәсіптендіру жолында жұмыс істейтін болады. Нысанның ашылу салтанатында ұйымдастырылған алғашқы көрмеге Талдықорғандағы «Қайнар-АКБ» ЖШС, «Ажар» тігін фабрикасы, Халық банкі мен Сбербанк ұжымдары бастаған кәсіпорындар шығаратын һәм тұтынатын тауарлар қойылды. Мұндай көрмелер ендігі уақытта жиі-жиі ұйымдастырылып тұратын болады. Себебі өңірдің көркейіп, дамуына ықпалын тигізетін қандай бастама да елдің назарынан тыс қалмауға тиіс.
Алмас НҮСІП,
«Егемен Қазақстан»
Алматы облысы
