Жыл басынан бері еуропішімде шыға бастаған газетте сараптамалық материалдарға басымдық берілді, төл авторлары мен колумнистері қалыптасты. Әр салаға арналған жаңа айдарлар мен арнайы беттер, тың жобалар пайда болды.
Әлбетте, жаңа уақыт – интернет кеңістігіндегі мүмкіндіктер кезеңі деп сипатталғанымен сапалы газет контенті әлі де дәстүрлі оқырманның сұранысына ие болып қала бермек. Өйткені қазір технологияның соны жетістіктері әркімнің қолына бір-бір камера, қолжетімді интернет жүйесі арқылы ақпарат тарату кеңістігін «сыйлап» отыр. Әрине, талғамға таразы жоқ. Десе де смартфон мен гаджет иелерінің ой-пайымы тұтас редакцияның, қалыптасқан дәстүрлі ақпарат құралының міндетін арқалауға қауқарсыз. Сондықтан да саналы оқырман сенімді ақпарат көзі ретінде дәстүрлі медианың өнімдерін тұтынады. Өйткені дәстүрлі медиа ақпарат тарату қоғамның назарын аудару ғана емес, журналист алдындағы жауапкершілік екенін жіті түсінеді. Осы тұрғыда ғасырға жуық тарихы бар аға газетте ормандай оқырманның ойынан шығу ниетімен кері байланыс тетіктері жүйелене түсті. Бұл үшін оқырмандарға газеттің күнделікті санының едел-жедел жетуінің маңызы зор.
«Егемен Қазақстан» газеті осы уақытқа дейін оқырман қолына негізінен жазылым арқылы жеткізілді. Айталық, газеттің бөлшек саудадағы үлесі 1 ғана пайызды құрағандықтан, оқырмандардың 99 пайызы газетті жазылу арқылы алатын. Ал жеке сатылым «Қазпошта» бөлімшелері арқылы ұйымдастырылып келді. Енді газеттің таралым саясаты қайта қаралып, күнделікті газет нөмірі тұрақты түрде бөлшек саудаға шығарылатын болды. Яғни редакция мен тарату кәсіпорындары арасында газетті бөлшек саудада сату туралы келісімге қол жеткізілді. Мәселен, алдағы уақытта «Kazakhstan Today» агенттігі» ЖШС-іне қарасты «Караван» дүңгіршектер желісінің 61 нүктесінде «Егемен Қазақстан» газеті сатылымға шығарыла бастайды. Бұл дүңгіршектер Алматы қаласында орналасқан. Алып мегаполистегі газеттің сатылымы халыққа қызмет көрсету орталықтарында да жүргізілетін болады. Нақты айтқанда, «Эврика пресс» ЖШС-мен бекіткен келісімшартқа сәйкес, газетті Алматы қаласының Бостандық аудандық және Әуезов аудандық ХҚО-дан алуға болады. Бұл мекенжайларға газет 2017 жылдың 26 қарашасынан бастап түсе бастайды. Ал Астана қаласында газет Сарыарқа аудандық және Алматы аудандық ХҚО-да сатылады. Газет сатылымын ұйымдастыру бағытындағы жұмыстар алдағы уақытта да жалғасын таба бермек. Жалпы, өткен ғасырдың тоқсаныншы жылдарының ортасынан бастап газеттің жеке дүңгіршектерде сатылуы кілт тоқтағандықтан, нарықтық тетіктер жүйесімен сатылымға шығарылуы араға ширек ғасыр салып қайтадан қолға алынып отыр деуге болады.
Бүгінде әлемдегі дамыған елдердің ақпараттағы мәдени кеңістігіне назар аударсаңыз, мерзімді басылымдардың рөлі нығая түскенін аңдауға болады. Мәселен, Жапония инновациялық технологияның түрлі буынын дүниеге алып келіп жатса да мерзімді баспасөзден бас тартпаған ел. Айталық, жапонның «Асахи Шимбун» басылымы 6,2 миллион дана таралыммен күніне 2 мәрте жарық көреді. Жапон аралдарында күніне миллиондаған таралыммен оқырманға жол тартатын газеттер туралы көптеп мысал келтіруге болады. Бұл газет оқудың озық мәдениеті. Біздің міндетіміз де елімізде газет оқу мәдениетін нығайта түсу болмақ. Қазір айтулы сарапшылар газетті газет күйінде оқудың электронды нұсқаға қарағанда көз жанарына әсері, жадыға жатталуы ерекше болатынын айтып жүр.
Бас басылым оқырмандарының ауқымды бөлігі бюджет қызметкерлері, оның ішінде еліміздің түкпір-түкпірінде еңбек етіп жатқан мұғалімдер мен дәрігерлер қауымы екені белгілі. Осы ретте оқырмандар басылым бетінен барлық салаға қатысты ақпаратқа қаныға алатынын айтқымыз келеді. Жыл басынан бері мектеп пен балабақша қызметкерлерінің оқу әдістемесі мен бала тәрбиесіне арналған «Тәлім» беті, жоғары білім беру жүйесіне бағытталған «Білім» беті жарық көреді. Аталған беттер алыстағы ауылдар үшін жаңа білім жүйесінің жаңалықтары мен әдістемелерінен хабардар болып отыруға жасалған мүмкіндік ретінде бағаланып отыр. Сондай-ақ оқушыларды жаңа форматтағы Ұлттық бірыңғай тестілеуге даярлауға көлемді орын берілді. Осы іспетті орамды жобалар әлі жалғасын табады. Бұл ретте редакция ұжымы Қазақстан мен жаһандағы өзекті оқиғаларға бейжай қарамайтын озық ойлы оқырмандармен тығыз әріптестік орнатуға мүдделі екенін естеріңізге саламыз.
