Форумға ҚХР Мемлекеттік туризм басқармасы төрағасының орынбасары ДУ Цзян, Мәдениет және спорт министрлігінің Туризм индустриясы комитетінің төрайымы М.Мурзамадиева, Оңтүстік Қазақстан облысының әкімі Ж.Түймебаев, «Kazakh tourism» ұлттық компаниясының төрағасы Р.Күзембаев, «Атамекен» ҰКП өкілдері, халықаралық және қазақстандық туроператорлар, инвестициялық компаниялар, туристік қауымдастықтар мен шетелдік және қазақстандық БАҚ өкілдері қатысты. Ашылу салтанатында облыс әкімі Жансейіт Түймебаев Оңтүстік туризміне қатысты жайттарды баяндап берді.
– Оңтүстік Қазақстан облысы – Орталық Азия, Таяу Шығыс пен Еуропа елдерін байланыстыратын жолдардың қиылысында орналасқан, – деді облыс әкімі. – Соның нәтижесінде шекаралық сауда-саттық пен экспорттық өндіріс өркендеп, облысымыздың туристік тартымдылығы артып, тамашалауға келуші туристер саны жыл сайын өсіп келеді. Мәселен, өткен жылмен салыстырғанда туристік нысандар саны облыста 31 пайызға өсіп, 195-ке жетті. Оларда көрсетілген қызметтер көлемі 43 пайызға көбейіп, 1,7 млрд теңгеге ұлғайды. Осының нәтижесінде биыл Оңтүстік Қазақстан облысына 128 мың турист келсе, бұл өткен жылмен салыстырғанда 55 пайызға артқанын көрсетеді.
Облыс басшысы Қытай Халық Республикасымен туризм саласында байланысты нығайтуға мүмкіндіктері мол екендігін жеткізді.
– Екі ел арасында туризмді дамытуға барлық мүмкіндіктер бар. Біздің өңірде туризмнің барлық саласы дамыған. Қыс мезгілінде тауға барып шаңғы тебуге болады. Келген меймандарды қарсы алатын 50-ден астам қонақ үй қызмет көрсетеді. Сонымен қатар тарихи туризм де оң жолға қойылған. 6 ғасыр бұрын соғылған тарихи нысандарымыз бар.
Сонымен қатар облыс әкімі Оңтүстікке келуші туристерге қолайлы жағдай жасау мақсатында 1, 2 және 3 күндік туристік маршруттар әзірленіп, аталған маршрутқа 84 тарихи-мәдени нысан мен табиғи орындар енгізілгенін айтты. Мәселен, «Ұлы Жібек жолы ескерткіштері» аталымы бойынша 8 ескерткіш, яғни Сауран, Түркістан, Сидақ, Қараспан, Жуантөбе, Күлтөбе, Отырар, Бөржар ескерткіштері Оңтүстік өңірінде орналасқанын жеткізді.
Форум барсында Бейжің халықаралық туристік қызмет көрсету орталығының бас менеджері Ян Ян:
– Біз бұл жерде қытай туристеріне мәліметтер жинақтауға келдік. Бізді бірінші кезекте Жібек жолы бойында орналасқан нысандар қызықтырады. Сонымен қатар Қазақ елінің ежелден келе жатқан тарихы, мәдениеті өте бай. Мені сіздердің елдеріңіздің қонақжайлылығы таңдандырып отыр. Екі ел арасындағы бейбіт қарым-қатынас туризмді дамытуға зор мүмкіндік береді, – деді.
Қазір әлемде туризмнен күреп пайда тауып отырған мемлекеттер көп. Дүние жүзінің ғажайыптарын көрсем, білсем, саяхат жасасам дейтін адамдар көп. Туристерді қай мемлекет болса да құшақ жайып қарсы алады. Өйткені ол мемлекеттің экономикасын көтеретін, адамдардың әл-ауқатын жақсартатын қып-қызыл ақша. Қазақстанның көп мемлекеттерден өзгешелігі жылдың төрт мезгілі де бар. Өмірінде қолына қар уыстап көрмегендерге басында сіре қары бір жібімейтін асқақ Алатау, арынды тау өзендері бұрқыраған, табиғаты жұмақтың өзіндей ер түріктің бесігі – Алтай бар.
Форумда сөйлеген сөзінде облыс әкімі Ж.Түймебаев:
– Елбасының «100 нақты қадам» Ұлт жоспарына сәйкес «Қазақстан Республикасының туристік саласын 2023 жылға дейін дамыту тұжырымдамасы» бекітілді. Оңтүстік Қазақстан облысы «Ұлы Жібек жолын қайта жаңғырту кластеріне» енгізіліп, кластер «Ұлы Жібек жолының жүрегі» ретінде сипатталып отыр. 1200-ден астам тарихи-археологиялық, мәдени-архитектуралық ескерткіштері, Ұлы Жібек жолы аумағындағы ең танымал және тарихи құндылығы жоғары, ЮНЕСКО-ның дүниежүзілік мәдени мұралар тізіміне енген Қожа Ахмет Ясауи кесенесі орналасқан Оңтүстік Қазақстан облысы аталған мәртебені алуы – біз үшін үлкен абырой және жауапкершілік, – деді.
Яғни әлемдік туризмге сұранып тұрған тарихи-мәдени ескерткіштер көп. Оның үстіне Оңтүстік Қазақстан облысы «Ұлы Жібек жолының» бойында тұр. Бұл дегеніңіз Қазақстанның туризмнен пайда көрерлік мүмкіндіктерінің молдығын аңғартады.
Форум аясында Оңтүстік Қазақстан облысындағы туризм саласы өкілдері мен Қытай, Өзбекстан және Қазақстанның басқа қалалары арасында 4 меморандумға қол қойылды.
Онда екіжақты әріптестікті нығайту мақсатында «Ontustik Tourism Center» туристік ақпараттық орталығы қытайдың «Salem China» компаниясымен және «Sky Way» туристік компаниясымен меморандум түзілді. Бұдан өзге, Оңтүстік Қазақстан облыстық кәсіпкерлік, индустриялық-инновациялық даму және туризм басқармасы мен Хатай провинциясы арасында меморандумға қол қойылды. Сондай-ақ «Ontustik Tourism Center» туристік ақпараттық орталығы мен Өзбекстанның туристік өнімін насихаттау орталығы арасында екіжақты меморандум түзілді.
Бақтияр ТАЙЖАН,
«Егемен Қазақстан»
Оңтүстік Қазақстан облысы
