Мерекелік шараларды 2018 жылдың тамызында өткізу ұсынылып, ол өтетін орынды аудан жұртшылығы әлі талқылау үстінде. Нақты шешімді жергілікті ақсақалдардың пікіріне сүйене отырып жасау көзделіп отыр. Мерейтойға орай «Бұқар жырау» энциклопедиясын қайта басып шығару, республикалық айтыс, ғылыми-тәжірибелік конференциялар ұйымдастыру, телебағдарламалар циклін жасау жоспарланған.
«Отырыс барысында бүгінгі таңда Бұқар жырау туралы бірде-бір пьеса мен фильм жоқ екені атап айтылды. Ұйымдастыру комитетінің өкілдері тек мерейтойлық шаралар туралы ғана емес, сонымен қатар ауданның елді мекендерін абаттандыру қажеттілігін де талқылады», делінген хабарламада.
Айта кетейік, Бұқар жырау Қалқаманұлының 350 жылдық мерейтойын өткізуге арналған Қоғамдық қор құрылатын болды.
