Фильмнен соң халық әртісі Айман Мұсақожаеваның, халықаралық байқаулардың лауреаты Еділ Құсайыновтың, әлемдік деңгейде өнер көрсетіп жүрген талантты әнші Димаш Құдайбергеннің, Қазақ ұлттық өнер университетінің Еуразиялық симфониялық оркестрінің, сондай-ақ «Шабыт, «Айгөлек» ансамбльдерінің қатысуымен үлкен концерт өткен.
Лос-Анджелесте «Spirit of the Great Steppe» – «Ұлы Дала рухы» деген атпен өтіп жатқан Қазақстан мәдениеті мен киносының күндері туралы Мәдениет және спорт министрі Арыстанбек Мұхамедиұлы төмендегіше пікір білдірді: «Еліміздің мәдениеті мен киносының күндері АҚШ-та тұңғыш рет өтіп жатқан жоқ. Десе де бұл жолы америкалықтарға көбінде қазақтың тарихынан хабар беріп, оның ұлт ретіндегі кескін-кейпін көрсететін фильмдер ұсынылды. Бұл қазақ мәдениетіне деген қызығушылықты оятатыны сөзсіз. Сондай-ақ бұл іс-шара екі ел арасындағы мәдени қарым-қатынас тарихында жақсы бір белес болмақ».
Шынында да америкалық көрермендерге отандық кино өндірісінің ең танымал және өз көрермендерімізден оң баға алған фильмдер ұсынылған. Оның ішінде Сұлтан Қожықовтың жарты ғасырға жуық уақыттан бері экраннан түспей келе жатқан, қазақ кино өнерінің төлқұжатына айналған «Қыз Жібек», Рүстем Әбдіраштың Елбасының өмірінен түсірген «Балалық шағымның аспаны» және қазақ тарихының тағдыршешті кезеңдерін өрнектеген «Қазақ хандығы. Алмас қылыш» көркем фильмдері бар.
Бұл фильмдердің барлығы Нью-Йорк киноакадемиясының Лос-Анджелестегі филиалында ағылшын субтитрларымен қазақ тілінде көрсетіледі. Ауқымды шараның аясында Нью-Йорк киноакадемиясында оқитын қазақстандық студенттермен отандық кинематография өкілдерінің кездесулері ұйымдастырылмақ.
Айта кетейік, Лос-Анджелесте өтіп жатқан айтулы шараға еліміз тарапынан АҚШ-тағы елші Ержан Қазыханов, Мәдениет және спорт министрі Арыстанбек Мұхамедиұлы, Қазақстан кинематографиялық өнері мен ғылымдары академиясының президенті Айман Мұсақожаева, КСРО және Қазақстанның халық әртісі Асанәлі Әшімов, халық әртісі Құман Тастанбеков, Қазақстанның еңбек сіңірген әртісі Меруерт Өтекешева және басқа да есімі елге елеулі өнер адамдары қатысуда.
Айгүл СЕЙІЛ,
«Егемен Қазақстан»
