Аймақ басшысының айтуынша, облыс өнеркәсібіндегі өсім 4,1 пайызды құраған.
«Бұл ретте маңызды рөл атқарған бірден-бір жайт облыстағы кәсіпорындарда технологиялық жаңғырту жұмыстарын жүргізу болды. Тек ірі компаниялардың өздері ғана технологиялары мен жабдықтарын жаңартуға шамамен 140 млрд теңге бөлген. Соның нәтижесінде барлық жүйе құрушы кәсіпорындар өндіріс көлемін ұлғайта алды. Атап айтсақ, жыл соңына дейін «АрселорМиттал Теміртау» АҚ 4,2 млн тонна болат, «Қазақмыс Корпорациясы» ЖШС 320 мың тонна мыс, «Шұбаркөл Көмір» АҚ 11 млн тонна көмір өндіреді деп жоспарланып отыр», деді Ерлан Қошанов.
Сонымен қатар ол «Бизнестің жол картасы-2020» бағдарламасы бойынша 183 жобаға қолдау көрсетілгенін және осы секілді мемлекеттік қолдаудың арқасында 24 млрд теңге көлемінде жеке инвестициялар жұмылдырылып, 800 жаңа жұмыс орындарын құру мүмкіндігі туғанын тілге тиек етті.
«Облыстың ауыл шаруашылығы саласында да жетістіктер аз емес. Облыс толығымен өзін негізгі азық-түлік түрлерімен қамтамасыз етіп отыр. Және де Астана қаласына жыл басынан бері 16 мың тонна ауылшаруашылық өнімдерін жіберіп, шетелге шығарып, өндіріс көлемін 24 пайызға ұлғайтқан», деді ол.
Облыста смарт-медицина белсенді түрде енгізілуде. Ол үшін аймақтың барлық ауруханалары мен емханалары бірегей ақпараттық желі құрған. Ерлан Қошанов емханаларға келушілердің үштен бір бөлігі дәрігерге қаралуға жазылу үшін ақпараттық қызмет түрін пайдаланатынын атап айтты. Сондай-ақ білім беру саласында да бірқатар жұмыстар атқарылып, жаңа мектептердің құрылысы жүріп жатқанын жеткізді.
Өңір басшысының сөзінше халықаралық ЭКСПО-2017 көрмесіне Қарағанды облысынан 3 мыңнан аса адам келіп қатысқан. Сонымен бірге өндірістерін жетілдіру үшін облыстың кәсіпорындары халықаралық көрмеде ұсынылған жаңа зерттемелердің арасынан 31 жобаны іріктеп, оларды әрі қарай жүзеге асыру амалдарын қарастыруда. Көрмеде қарағандылық ғалымдар ұсынған жобалардың ішінен үшеуі қолданысқа енгізілген. Олар – биозгаз құрылғысы, шағын ГЭС және гидродинамикалық жылытқыштар. Тағы 4 жоба тестілеу және жүзеге асырылу кезеңінде.
«Қазіргі таңда өзекті де трендті бағыт – жаңғырмалы энергия көздеріне қатысты да Қарағанды өңірі алға жылжып келеді. Облыста жалпы қуаттылығы 261 МВт құрайтын 6 жаңа жасыл энергетика нысандарының құрылысы жоспарланған. Ол – 3 күн электр стансалары, 2 жел паркі және 1 биогаз құрылғысы», деді әкім.
Облыс басшысы «Туған жер» бағдарламасы шеңберінде аймақта жалпы сомасы 13 млрд теңгені құрайтын 400 жоба жүзеге асырылып жатқанын, оның ішінде 5 млрд теңге демеушілердің бөлген қаражаты екенін алға тартты.
«Рухани жаңғырудың» жарқын мысалы ретінде Ұлытаудағы туристік инфрақұрылымның дамуын келтіруге болады. Киелі мекенде қонақ-орталығы мен этноауылдың құрылысы жоспарланып отыр. Ал келесі жылы Ұлытауда этнофестиваль өтеді, сондай-ақ әлемнің түрлі елдерінен жиналатын археологтар, геологтар және тарихшылардың қатысуымен халықаралық симпозиум ұйымдастырылады деген жоспар бар», деді Ерлан Қошанов.
Рауан ҚАЙДАР,
«Егемен Қазақстан»
