Медиа-мектеп келешекте студенттердің теория мен практиканы ұштастыра отырып, университет қабырғасында жүріп-ақ редакциялар мен баспахананың қайнаған тіршілігімен емін-еркін араласуын, кәсіби журналистерден тәлім алып, тәжірибе жинақтауын мақсат тұтады. Онда Атырау мемлекеттік университетінің профессорлық-оқытушылық құрамынан бөлек, елімізге және өңірімізге танымал журналистер, медиа мамандары мен кәсіби тренерлер өз тәжірибелерімен бөлісіп, дәріс оқиды. Сондай-ақ медиа-мектеп қабырғасында тек университет студенттері ғана емес, ақпарат саласындағы жас мамандар, оқушылар, жас тілшілер және т.б. ынта білдірген талапкерлер білім алуға мүмкіндік алады. Медиа-мектеп заманауи дәріс аудиторияларына лайықталып, мультимедиялық құрылғылармен жабдықталғанын айта кеткен жөн.
Тағы бір жағымды жаңалық, «Атырау-Ақпарат» медиа-мектебінде облыстық ішкі саясат басқармасының қолдауымен журналистерге арналған ақысыз ағылшын тілі курстары жұмыс істей бастады.
«Атырау-Ақпарат» ЖШС директоры Баязи Әбдешев мұндай жобаның өңірдегі ақпарат саласы үшін маңызы зор екенін айтады. «Х.Досмұхамедов атындағы Атырау мемлекеттік университеті өзіндік орны бар, талай мамандарды даярлаған іргелі білім ордасы. Соңғы 20 жылда филология факультетінің жанынан журналистика кафедрасы ашылған болатын. Университет пен «Атырау-Ақпарат» серіктестігінің бірлескен жобасы осынау медиа-мектеп арқылы болашақ журналистердің теориялық білімін тәжірибелік біліктілікпен ұштастыруды көздейді. Журналистика саласындағы білікті мамандарды даярлауда бұл бір маңызды қадам деуге болады», – дейді серіктестік директоры.
Ал Х.Досмұхамедов атындағы Атырау мемлекеттік университетінің ректоры Абзал Талтенов, бірлескен жобаның мәні мен ерекшелігіне тоқталды. «Бүгінде университетте журналистика мамандығында 150 студент оқып жатыр. Алдағы уақытта медиа-мектепке тәжірибелі журналистер келіп, дәріс оқыса, студенттер өз білімін жетілдіре түсері сөзсіз», – деп түйіндеді Абзал Талтенов.
Бақытгүл БАБАШ,
«Егемен Қазақстан»
