Тұрғындарға бұл істе прокурорлар мен сала мамандарының кеңесі жетіспей жатады. Қостанайда ашылған Құқық қорғау қызметтері орталығы енді осындай қиыншылықтарды артқа тастайтын болады. Еліміздің Бас прокурорының бастамасымен ашылып жатқан орталықтар азаматтарға құқық қорғау ісінде жақсы қолайлылық туғызады. Бас прокуратураның Астанадағы ғимаратында ашылған осындай орталық өз жемісін беріп отыр. Үш айдың ішінде оған 2,5 мың адам келіп, құқығын қорғауда көмек пен кеңестер алған. Сонымен қатар Ақтөбе, Қызылорда қалаларындағы Құқық қорғау қызметтері орталықтарына ай сайын шамамен 200 адам келеді. Қазақстандағы төртінші орталықтың ашылу салтанатына Бас прокурордың орынбасары Марат Ахметжанов арнайы келіп қатысты.
– Тұрғындардың кабинеттен кабинетке жүгіріп сенделмей-ақ, «бір терезе» ұстанымымен бір жерден құқықтық қызмет көмегіне жүгінуіне мүмкіндік туды. Келушілерге нотариус, адвокат, медиатор, салық саласы қызметкерлерінің, психолог мамандардың көмегі көрсетіледі. Бұл мемлекеттік және құқық қорғау органдарына азаматтардың сенімін арттыру болып табылады. Бұдан былай қылмыстық процестер электронды цифрландырылады да, азаматтар осы арадан-ақ көмек ала алатын болады, – деді Марат Мұратұлы.
Орталықта кезекші прокурорлар азаматтардың әлеуметтік-экономикалық арызшағымдарын, әкімшілік өндіріс, сотқа дейінгі тергеу мен азаматтық және қылмыстық істердің сот барысы тергеуі мәселелерін қарайды. Кез келген азамат алдын ала жазылмай-ақ орталыққа келіп, қажетті заңды кеңесін алып, арыз-шағымын бере алады. Мамандар барлық мәселенің кешікпей, уақтылы шешімін табуға көмек көрсетеді, кеңес беріп, бағыттайды. Құқық қорғау қызметтері орталығында кезекшілік еткен прокурорлардың жедел қажеттілік үшін аймақтық прокуратура мен өзге де өкілетті органдардан ақпараттар алуға қолжетімділігі сақталған.
Орталықтың ашылуына облыстық әкімдік зор қолдау білдірді, ғимаратты жөндеп, жабдықтауға 13 миллион теңге қаржы жұмсалды. Облыс әкімі Архимед Мұхамбетов жаңа нысанның құқық қорғау қызметінің барлық саласы бойынша тұрғындарға көмегі зор болатынына сенімді екенін айтты. Өңір басшысы мұндай орталықтар облыстың басқа да аудан-қалаларында ашылатынынан хабардар етті. Қазір ол үшін ғимараттарды жөндеу, басқа да дайындық жұмыстары жүріп жатыр.
Орталық электронды кезек жүйесімен қамтамасыз етілген. Ал уақыт жоғалтпау үшін «Азаматтарға арналған үкімет» мемлекеттік корпорациясы ұсынатын электронды форматтағы қызмет алуға да мүмкіндік бар. Кезекші прокурорлар аумақтық бөлімшелер мен басқа да өкілетті органдардан негізгі қажетті ақпараттарды жедел ала алады. Сегіз кабинет келушілерге түрлі құқықтық қызмет көрсетеді. Облыс прокурорының бірінші орынбасары Марат Әбішевтің айтуынша, таяу арада мұнда еліміздегі осындай орталықтар арасында бірінші рет онлайн-режім іске қосылатын болады.
Нәзира ЖӘРІМБЕТ,
«Егемен Қазақстан»
ҚОСТАНАЙ
Суретті түсірген
Бағдат АХМЕТБЕКОВ
