Жаңа орталықта құқық қорғау органдары қызметкерлерінің оқу-жаттығу жиындарын өткізуге барлық жағдай жасалған. Мұнда заманауи интерактивті тир, қару-жарақ қоймасы, тренажер залы, күрес залы, кедергі жолақтары бар спорттық қалашық, мәжіліс залы, 50 төсек-орындық казармалық үй-жай мен асхана бар.
Орталық соңғы үлгідегі бейнебақылау және арнайы байланыс жүйелерімен, кабинеттері қазіргі заманға сай құрылғылармен жабдықталған. Келер жылы бұл жерде атыс тирі мен тағы бір спорт алаңы пайда болмақ. Алдағы уақытта орталыққа облысымыздың барлық аудан-қаласынан полиция қызметкерлері келіп, алты күндік оқу-жаттығу жиындарына қатысып, кәсіби біліктіліктерін арттыратын болады.
«Бір жарым жыл бұрын бұл ғимарат бос тұрған еді. Қажетті қаражатты бөлдік. Енді облыстық ІІД жеке құраммен теориялық және тәжірибелік тұрғыда оқыту өткізу үшін жақсы база бар. Мұнда дайындықтың барлық түрінен өту арқылы қиын да қауіпті қызметтеріңізде кездесетін кез келген жағдайға дайын болғандарыңызды қалаймыз. Осы ретте сіздерге айтар жаңалығым, келесі жылы ішкі істер қызметкерлеріне арналған үйдің құрылысын бастаймыз», – деді облыс әкімі Даниал Ахметов жаңа орталықтың ашылу салтанатында.
Реті келгенде айта кетейік, биыл облыстық бюджеттен ІІД материалдық-техникалық қорын жақсарту мақсатында 3,5 млрд теңге бөлініп, 276 автокөлік пен 10 автобус сатып алынған-ды. Бұл ретте Шығыс Қазақстан облысының ішкі істер құрылымын автокөлікпен қамтамасыз ету және техникалық қаруландыру бойынша республикада алғашқы орында тұрғанын ерекше атап өтуге болады.
Азамат ҚАСЫМ,
«Егемен Қазақстан»
ӨСКЕМЕН
