Маңызды құжатқа «Қазақстанның тұрғын үй құрылыс жинақ банкі» АҚ облыстық филиалының басшысы Нұрлан Күзембаев пен «Восток-Клио» ЖШС директоры Вячеслав Тарнайкин қол қойды.Тоқсан бес пәтерлі, бес қабатты жаңа үй Күленов шағын ауданында бой көтерген «Ривьера Резиденс» тұрғын үй кешенінде орналасқан. Ерекше сәулетімен көз тартатын зәулім ғимарат алаңында бірнеше спорт және ойын алаңдары, автотұрақ, сенімді қауіпсіздік жүйесі, дәріханалар мен наубайхана, супермаркет, банк бөлімшелері ашылып, кешен тұрғындары үшін барынша қолайлы жағдай жасалған. Бүгінде аумағы 46 шаршы метрден 242 шаршы метрге дейін жететін бір, екі, үш, төрт бөлмелі пәтерлер сатыла бастады. «Жеке құрылыс салушыларды тұрғын үй салуға ынталандыру» бағытын жүзеге асыруға үш тарап қатысып отыр. Екінші деңгейлі банк жеке құрылыс салушы «Восток-Клио» ЖШС-ге жеңілдікпен несие береді. Өйткені халықтың әр санатының тұрғын үй мәселесін кешенді шешу мақсатында Елбасының тапсырмасымен қолға алынған осы бағдарламаның аясында мемлекет «Даму» қоры арқылы жеке құрылыс салушылардың несиелері бойынша сыйақы мөлшерлемесінің 7 пайызын субсидиялап отыр. Мұның өзі салынған тұрғын үйдің шаршы метрінің құнын төмендетуге мүмкіндік берді. Мәселен, аталған үйдің нарықтағы бағасы шаршы метріне 200 мың теңге болса, ұсынылып отырған баспананың шаршы метрі – 175 мың теңге. «Қазақстанның тұрғын үй құрылыс жинақ банкі» АҚ-тың облыстық филиалы бұл пәтерлердің 50 пайызын өз салымшыларына ұсынады. Тұрғын үй ресімдеуде азаматтардың жасына қарамайды. Үй құнының 30 пайызын төлеп, әрі қарай несие төлеуге жалақысы жететін болса, кез келген азамат баспана ала алады.
Өңірімізде тұрғын үй құрылысы қарқынды дамып келеді. Қазақстанның тұрғын үй құрылыс жинақ банкі салымшыларының саны 78 мыңнан асты. Бүгінгі таңда банктен шот ашуға жеңілдік жасалып, тегін жүргізіліп жатыр. Шотқа белгілі мерзімге дейін қаржы жинаған соң салымшыларымыз ипотека ғана емес, сонымен қатар жеке үй салуына, баспанасын жөндеу жұмыстарына қажетті несиені банктен арзан пайызбен ала алады. Жыл соңына дейін 1142 салымшы өз баспаналарының кілтіне ие болады. Ал 2018 жылы тағы да 1 мыңнан астам пәтер салымшыларға ұсынылады», дейді облыстық филиал директоры Н.Күзембаев.
Азамат ҚАСЫМ,
«Егемен Қазақстан»
ӨСКЕМЕН
