Кеше Парламент Мәжілісінің кезекті жалпы отырысы болып, оны палата Төрағасы Орал Мұхамеджанов ашып, жүргізіп отырды. Тоғыз мәселе енгізілген күн тәртібінің жобасы бірауыздан қабылданды.
Соның ішінде ең маңыздысы «Индустриялық-инновациялық қызметті мемлекеттік қолдау туралы» заң жобасы екені көрініп тұрды. Ол бірінші оқылымда мақұлданды.
Заң жобасы бойынша баяндама жасаған Индустрия және жаңа технологиялар министрінің бірінші орынбасары Альберт Рау қабылданатын заңнама өндірісті индустрияландыру ісін дамытуға, ғылыми, экологиялық таза және бәсекеге қабілетті жоғары технологияларды енгізуге ынталандырады, деді. Сонымен бірге заң жобасы индустриялық-инновациялық шағын және орта бизнесті құруға мүмкіншілік беріп, аймақтардың кешенді және тиімді дамуына өз үлесін қосады. Заң жобасын талқылау барысында жұмыс тобының отырыстарына қатысқан депутаттар өздерінің түзетулері мен толықтыруларын айтты. Соның ішінде жер үлестері конкурссыз берілетін индустриялық-инновациялық субъектілерді анықтау бойынша қосымшалар енгізді, деді вице-министр. Сол арқылы заң жобасы мемлекеттік органдар мен индустриялық-инновациялық қызмет субъектілерінің арасында туындайтын қоғамдық қатынастарды реттейді дей келіп А.Рау ағымдағы жағдайларды бағалау негізінде және елдің экономикалық дамуының ұзақ мерзімді мақсаттарына қол жеткізу үшін индустриялық-инновациялық қызметті мемлекеттік реттеу мәселелерімен тікелей немесе жанама қиылысатын Қазақстан Республикасының кейбір заңнамалық актілеріне де өзгерістер мен толықтырулар енгізу қажеттігін атап өтті. Сөйтіп, ілеспе заң жобасы бойынша Жер және Салық кодекстеріне, сондай-ақ «Қазақстан Республикасындағы жергілікті мемлекеттік өзін-өзі басқару туралы», «Акционерлік қоғамдар туралы», «Сауда қызметін реттеу туралы», «Концессиялар туралы», «Мемлекеттік сатып алу туралы», «Білім туралы», «Ұлттық әл-ауқат қоры туралы», «Жер қойнауы және жер қойнауын пайдалану туралы» заңдарына толықтырулар енгізіледі. Біраз депутаттар сұрақтар беріп, кейбір мәселелерді анықтаған соң екі заң жобасы да бірінші оқылымда мақұлданды.
Мәдениет министрі Мұхтар Құл-Мұхаммед «Материалдық емес мәдени мұраны қорғау туралы конвенцияны ратификациялау туралы» заң жобасы жөнінде баяндама жасады. Депутаттар бұл мәселені талқылауға да қызу қатысып, көптеген сұрақтар берді. Баяндамашы қазақтың домбыра және қобызбен орындалатын күй өнерін, айтысты, орындаушылық шеберліктер және т.б. толып жатқан материалдық емес мұрасын осы заң жобасын қабылдап, конвенцияны ратификациялаған соң ЮНЕСКО-ның қорғауына алдырамыз деген соң депутаттар заң жобасын қызығушылықпен мақұлдады. Конвенцияның өзі 2003 жылы 17 қазанда Парижде қабылданған.
Сонымен қатар отырыста «Қазақстан Республикасының кейбір заңнамалық актілеріне зияткерлік меншік мәселелері бойынша өзгерістер мен толықтырулар енгізу туралы» заң жобасы екінші оқылымда депутаттар талқысына шығарылды. Жұмыс тобында қаралған мәселелер және жаңадан енгізілген түзетулер туралы Мәжілістің Заңнама және сот-құқықтық реформа комитетінің мүшесі Зағипа Балиева баяндап өтті. Заң жобасында зияткерлік меншік құқықтары мәселелерін реттейтін Қазақстан Республикасының қолданыстағы заңнамалық актілеріне өзгерістер мен толықтырулар енгізу көзделген. Заң жобасында қарастырылып отырған, басқа заңнамалық актілерге енгізілетін түзетулер ішкі қайшылықтарды жоюға, патенттік сенім білдірілген өкілдер мәртебесін заң жүзінде бекітуге, сондай-ақ өнеркәсіптік меншік объектілеріне өтінімдерді қарау мерзімін қысқартуға бағытталған.
Қаралған мәселелердің арасында Парламент Мәжілісінің Регламентіне өзгерістер мен толықтырулар енгізу, «2012-2014 жылдарға арналған республикалық бюджет туралы» Қазақстан Республикасы Заңының жобасына Қазақстан Республикасы Парламентінің Сенаты енгізген өзгерістер мен толықтыруларды қарау да енгізілген екен. Бұл мәселелер палата депутаттары тарапынан қолдау тапты.
Жақсыбай САМРАТ.