Қытайдың Хубэй провинциясында 61 миллион адам тұрады. Ел экономикасында бесінші орынға, ішкі өнім өндіруде жетінші орынға ие. Ухань қаласында жергілікті компания басшылары қатысқан келіссөздер барысында бірлескен жобаларды жүзеге асырудың стратегиялық бағыттары талқыланды. Азық-түлік өнімдерін импортқа шығаратын ірі сауда желілерінің жетекшілері әріптестік қарым-қатынастың дамуына ниеттестік білдірді. Бейжің қаласы мен Шаньдун, Хэнань, Цзянсу, Шэнси провинцияларынан келген кәсіпкерлер өңірдің ауылшаруашылық саласына қаржы құюға қызығушылық танытты. Қазақстанның инвестициялық мүмкіндіктері өте ауқымды. Ол үшін барлық жағдай жасалғанын жақсы білеміз, десті олар өз сөздерінде. Қытайлық бизнес өкілдерімен болған кездесуде бірлескен жобаларға басымдық берілді. Таяу арада Бейжіңде өзара уағдаластық мәселелерін реттеп отыратын облыс кеңсесі ашылатын болады.
– Біз бірнеше бағытта экономикалық ынтымақтастық шарттарын ұсынамыз. Ауыл шаруашылығы, өнеркәсіп, инновация, сауда салалары бойынша тартылған инвестицияларға мемлекет есебінен өндірістік инфрақұрылымдар салынады. Әр жоба аясында жол картасы әзірленеді, – деді Құмар Іргебайұлы.
Хубэй провинциясының губернаторы Ван Сяодунмен кездесу қос тараптың кәсіпорындары және бизнес өкілдерімен байланысты өрістету, оларға жағдай жасау тақырыбына арналды. Жоғары өндірістік базаға, ғылым мен білім әлеуетіне ие Хубэй провинциясы мен табиғи ресурстарға бай, ауыл шаруашылығы өркендеген Солтүстік Қазақстан облысы бір-бірінің экономикасын толықтыратынына сенім білдірісті. Кездесу соңында облыстық әкімдік пен провинция халық үкіметі арасындағы ынтымақтастық жөніндегі меморандумға қол қойылды.
Қ.Ақсақалов Шиян қаласының басшысы Занг Вейгуамен кездесіп, автомобиль жасаумен және оның саудасымен айналысатын «Dongfemd Motor Corporation» зауытының жұмысымен танысты. Сөз арасында он бір айда өңір экономикасына 144 миллиард теңге инвестиция құйылғанын айта кеткен жөн.
Өмір ЕСҚАЛИ,
«Егемен Қазақстан»
Солтүстік Қазақстан облысы
