ЗАҢ БҰЗУШЫЛАР ЖАЗАЛАНДЫ
«Жол картасы», «100 мектеп, 100 аурухана», «Таза су» мемлекеттiк бағдарламаларының орындалуы Елбасымыздың назарында тұрғаны белгiлi. Осы бағдарламалардың байыпты iске асу барысына прокуратура жүргiзген тексерулер нәтижесi қандай деп сұрайды Шымкент қаласының тұрғыны Айжан Сейдахметова.
“Егемен Қазақстанның” Оңтүстік Қазақстан облысы бойынша меншікті тілшісі Бақтияр Тайжан облыс прокуроры Берік Сайлауұлы Құлтасовқа:
– Сіз не дейсіз?
– Орынды сұрақ. «Жол картасы», «100 мектеп, 100 аурухана», «Таза су» мемлекеттiк бағдарламаларының орындалуының мерзiмi 2010 жылы аяқталғанын жақсы бiлесiздер. Осы бағдарламалар бойынша облыстық прокуратура тарапынан бiрнеше тексерулер жүргiзiлiп, көптеген заң бұзушылықтар анықталды. Атап айтсақ, жұмыстар туралы актiлерге, жұмыс уақытын есептеу табельдерiне жалған мәлiметтердi енгiзiп, бюджеттiк қаржыларды жымқыру әрекеттерi әшкерелендi. Жалпы, аталған бағдарламаларды тексеру қорытындысымен 10 қылмыстық iс қозғалып, 7 лауазым иесi сотты болды, 28 ұсыныстың негiзiнде 26 адам жауапқа тартылды. Бюджетке 73,8 млн. теңге қайтарылды. 424 азаматтың конституциялық құқықтары қорғалды.
Шымкент.