Жиынға кеңес мүшелері, Мәжіліс депутаттары, Мәдениет және спорт министрлігінің өкілдері мен кәсіби сарапшылар қатысты. Іс-шара барысында «Қасиетті Қазақстан» ғылыми-зерттеу орталығының директоры Берік Әбдіғалиұлы қасиетті орындар туралы баяндама жасады. Оның айтуынша, Қазақстанның киелі мекендері ерекшеліктеріне орай бөлінген. Мәселен, табиғи тұрғыда қалыптасқан қасиетті орындар дербес қарастырылған. Олардың қатарында Қоңыр әулие үңгірі, Хан Тәңірі, Шарын шатқалы секілді мекендер бар. Археологиялық ескерткіштер мен орта ғасырдағы шаһарлар келесі бөлімге енген. Сондай-ақ Б.Әбдіғалиұлы «Қазақстанның қасиетті жерлерінің жалпыұлттық және аймақтық тізімі» деген кітап жарыққа шығатынын мәлімдеді.
«Қазақстанның қасиетті жерлерін бекіткенде олардың мәртебесін айқындау арқылы ескерткіштерді қорғау жөніндегі заңға өзгеріс енгізуді көздеп отырмыз. Мәдени ескерткіштерді қорғау туралы заңға «Қасиетті орындар» деген тармақты қосу жоспарда бар. Осындай қадам арқылы әр мекеннің ғылыми әрі заңды түрде анықтамасы беріледі. Осылайша, Қазақстандағы қасиетті орындардың мәртебесі заңды түрде белгіленеді», деді Б.Әбдіғалиұлы.
Сонымен қатар іс-шарада «Қазақстанның киелі жерлерінің географиясы» жобасының орындалу барысы жөнінде Мәдениет және спорт министрлігі тарапынан атқарылып жатқан жұмыстар баяндалды. Отырысқа қатысушылар осы төңіректе ой қозғап, өз пікірлерімен бөлісті.
Абай АСАНКЕЛДІҰЛЫ,
«Егемен Қазақстан»
