Сенбі күні Көлік және коммуникация министрі Берік Камалиев пен Ақмола облысының әкімі Сергей Дьяченконың қатысуымен «Щучье – Бурабай курортты аймағы» автомобиль жолының ашылу салтанаты болып өтті.
Елбасының тікелей тапсырмасымен 2009 жылы Қазақстандағы алғашқы алты жолақты, жоғары жылдамдықты «Астана – Щучье» автомагистралі пайдалануға берілді, деді өз сөзінде министр Б.Камалиев. Осының нәтижесінде екі аралықтағы уақыт екі есе қысқарып, жол апаты да екі есе азайды. Бүгін туристік кластерді дамыту шеңберінде курортты аймаққа төте бастайтын 8,9 шақырымдық төрт жолақты трасса ашылып отыр. Жолдың өн бойында қоршаулар, көпірлер, елді мекендер аумағында электр жарығы орнатылып, жаяу жүргіншілерге қажетті жағдайлар жасалды. Жалпы, Ақмола облысы бүгінгі күні ірі автожол жобаларын іске асыруда және заманауи технологияларды қолдануда көшбасшы болып отырғанымен құттықтаймын.
Облыс әкімі С.Дьяченко бүгінгі қуанышты шараның Ақмола облысының Астанадағы күндері қарсаңында өтіп отырғаны жұртшылықты серпіліске түсіргенін айтты. Курортты аймақтың тартымдылығын арттыру мақсатында атқарылып жатқан істер үшін алғыс білдірген ол Көкшетау қаласы әуежайында ұшу-қону жолағын қайта салу жобасы ойдағыдай атқарылып жатқандығын мәлімдеді.
Бақберген АМАЛБЕК,
Ақмола облысы.