Спорт • 04 Қаңтар, 2018

Жанбота Алдабергенова: Пхенчханда финалға енуді мақсат етемін

364 рет
көрсетілді
6 мин
оқу үшін

Төртжылдықтың басты додасы Пхенчхандағы Олимпия ойындарына санаулы күн қалды. Спортшыларымыз бүгінде соңғы дайындықтарын пысықтап, жолдамалардың тағдырын шешу жолында аянып жатқан жоқ. Еліміздің қысқы спорт түрлерінде кетіп жүрген есесін қайтармақ. Солардың бірі – фристайлдың акробатика түрінен тәп-тәуір жетістіктерге жетіп жүрген, фристайлдан Универсиада ойындарының қола жүлдегері Жанбота Алдабергенова. Алматыда өткен Универсиадада қола жүлдемен көзге түскен Жанбота 2017 жылды қорытындылап, Олимпиадаға даярлығымен бөлісті. 

Жанбота Алдабергенова: Пхенчханда финалға енуді мақсат етемін

– Жанбота, жаңа жылға табан тіредік. Ал 2017 жыл сіздің есі­ңізде несімен қалды?

– Өткен жылға алғыс айтамын. Өздеріңіз білетіндей, 2017 жыл Қазақстан спорты үшін маңызды оқиғамен бас­талды. Алматы қаласы тұң­ғыш рет Бүкіәлемдік қысқы Универсиаданы қабыл­дап, халықаралық аламанды жо­ғары деңгейде өткіздік. Сту­дент­тер арасындағы жарыс­та қо­ла жүлдегер атандым. Жалпы­ко­ман­далық есепте екінші орын ал­дық. Сонымен қатар екінші жыл қатарынан Еуропаның абсолютті чемпионы атағын жеңіп алдым.

– Олимпиадада үміт артып отырған бірден-бір спортшы­сыз. Төртжылдықтың басты до­да­сына жолдама алу қан­ша­лықты қиын болды?

– Олимпиадаға қатысу кез келген спортшының арманы еке­нін ескерсек, бұл жолда еш­кімнің де аянып қалмасы анық. Сондықтан Олимпия ойындары, әлем чемпионаттарының жүл­дегерлерімен бір қатарда тұ­рып ұпайды сарапқа саламыз. Олимпиадаға бару үшін рейтинг­тегі 25 спортшының ортасында болуға міндеттісің. Сондықтан бұл оңай шаруа емес. Шындап келгенде, жолдама­ны қолыма әлі алған жоқпын. Пхенчханға кімнің баратыны қаңтар айында белгілі болады. Әзірге дайындықты жал­ғастыра береміз.

– Жалпы, Олим­пиа­даға соңғы дайын­дық қалай жүріп жатыр?

– Көңіл күй де, даярлық та жаман емес. Жақында Қытайда өткен Әлем кубогы кезеңінен оралдық. Енді Мәс­кеуге Олимпиада алдын­дағы Әлем кубогы кезеңіне аттанамыз. Бұл – менің екінші Олим­пиадам. Уақыттың алдына шығудың қажеті жоқ деп ойлаймын. Сәтін салса, финалға шық­қандардың қатарына енсем деген жоспар бар.

– Сіз бақ сынайтын фрис­тайлда секіру элементтерін дұ­­рыс жасау аздық етеді, кө­рер­­­мен мен төрешілерді баурап алатын­дай әдемі де болуы ке­рек. Сіз өз жанкүйерлеріңізді бұл жолы немен таң қалды­ра­сыз?

– Негізі бірнеше жаңа эле­ментті қоссам ба деп ойлаған­мын. Әзірге сенімсіздік бар. Жа­­рыста қиын элементтерді жа­­саймын деп құлап жатқанша, әрбір қимылыңды таза орындап шығу маңызды.

– Басты қарсылас деп кім­дерді айтар едіңіз?

– Әзірге қарсыластарымның аты-жөндерін толық қарап шық­қан жоқпын. Бұл спорттың негі­зінен Қытай, Ресей мен Бела­русьте қарқынды дамығанын ес­кер­сек, осы елдердің спортшы­лары жүлдеге таласады деп ойлаймын.

– Сіздің фристайлға осыдан бірнеше жыл бұрын ғана келгеніңізді білеміз. Таң­дауы­ңыз неге фристайлға түсті?

– Спорттық гимнастикада 9 жыл жүріп спорт шебері ата­ғын алдым. Бұл менің аталмыш спорттағы мүмкіндігімнің шегі секілді көрінді. Сондықтан кез келген спортшы секілді мен де Олимпиадаға қатысу үшін жолымды басқа спорт түрінен іздеп көрейін деп шештім. 2011 жылғы Азиаданы теледидар арқылы тамашалап отырып фристайл жарыстарына көзім түсті. Фристайл мен спорттық гимнастиканың ортақ тұстары көп. Бәлкім, осы себепті де спорттың мен үшін жа­ңа, қысқы түріне бейімделу қиын соқпаған шығар. Аз уақыт­тың ішінде спорт шебері атанып, кейіннен халықаралық дәрежедегі спорт шебері атағына қол жеткіздім.

– Аз ғана уақыттың ішінде шаңғы фристайлынан біраз жетістікке жеттіңіз. Сіздің ойы­ңызша, бұл спорт түрін таң­­даған адамға ең алдымен не керек?

– Қай салада жетістікке же­темін десең де ең алдымен адам­­ның құлшынысы болуы керек. Алдыңда кездесетін қиын­дық­­қа төзе білген жөн. Сонда ғана көздеген мақсатыңа қол жеткізесің.

– Сіздің фристайлмен шұғыл­данып жүр­геніңізді бастапқыда ата-анаңыз біл­меген екен. Қазір жарыс­та­ры­ңызды тамашалап жүре ме?

– Алғашында олар рұқсат бермейді деп фристайлмен кә­сіби түрде шұғылданып жүрге­німді айтпаған едім. Олар мені тек шаңғы тебуге барып жүр деп ойлайтын. Бірінші рет Со­чидегі Олимпиадада көрген. Жа­­рыстар көбінде шетелде өте­тіндіктен, негізінен тек теледидар не ғаламтор арқылы көріп қол­дап отырады. Үйде көп бола бер­мейтініме де үйренген. «Өз тойыңда үйде болсаң болғаны» дейді.

– Универсиада Қазақстанда шаңғы акробатикасының дамуына қаншалықты әсер етті деп ойлайсыз?

– Универсиада арқылы бұл спорттың танымалдылығы арт­­қаны анық. Фристайлмен шұ­ғыл­данатыныңды айтсаң, біреулер «бұл бидің бір түрі ме?» деп сұрап жатады. Со­сын түсіндіріп отырғаның (кү­ліп). Қазір жағдай өзгеріп ке­леді. Өзім балалар фристайл үйір­мелеріне көптеп жазылса екен деймін. Яғни бұл спорттың дамуы үшін алдымен бәсеке керек. Қытайда солай. Сондықтан олардың атлеттерінің деңгейі де жоғары. 

– Уақыт бөлгеніңізге рах­мет! Біз де сізге сәттілік жол­дас болсын деген тілегімізді біл­­­­діреміз.

Әңгімелескен

Мәдина АСЫЛБЕК,

журналист

Соңғы жаңалықтар

Алғыс арқалаған хирург

Маман • Бүгін, 10:10

Қатерлі ісікпен алысқан

Медицина • Бүгін, 09:50

Үздік отбасылық дәрігер

Медицина • Бүгін, 09:40

Марқакөлдің мейіргері

Медицина • Бүгін, 09:30