Өңірлік жұмыспен қамту орталығының мәліметінше, өткен жылдың қаңтар-желтоқсан айларында 22 мың жұмыссыз адам жұмыспен қамтылған.
Жұмыспен қамту орталықтарында еңбеккке араласуға өтініш білдіргендердің ішінен 5 441 жұмыссыз адам ақылы қоғамдық жұмыстарға орналастырылып, 2 793 адам қайта даярлауға және біліктілігін арттыру курстарына жіберілді. Әлеуметтік жұмыс орындарына 716 жұмыс орны бөлініп, жұмыс берушілерден алынған бос жұмыс орындары үшін 14 802 адам қызметке орналастырылды.
- Атырау облысының тұрғындарын жұмыспен қамтуды қолдаудың кешенді жоспарына сәйкес, 2017 жылдың 31 желтоқсанының жоспары 145% орындалды. Жұмыс орындарының қысқаруына жол бермеу үшін жұмыс берушілерді жұмыс орындарында сақтауға немесе басқа жобаларға ауыстыру үшін жұмыс берушілер арасында түсіндіру жұмыстары жүргізілді. Нақтырақ айтқанда, облыс әкімдігі және 2539 жұмыс берушілер мен кәсіподақтар арасында меморандумдарға қол қойылды. Нәтижесінде 869 жұмыс орны сақталды, оның ішінде 1228 адам жұмыспен қамтылды,- дейді Атырау облысының жұмыспен қамту орталығының мамандары.
Сонымен қатар есепті кезеңде 53 бос жұмыс орындары жәрмеңкесі өткізіліп, нәтижесінде 2 002 адам қызметке орналастырылды.
Бақытгүл БАБАШ,
"Егемен Қазақстан"
