Таяуда жыраудың аты берілген ауданның орталығы Ботақара кентінде мерейтой шараларын ұйымдастыру жөніндегі комиссияның отырысы өтіп, онда бірқатар мәселелер талқыланды. Атап айтқанда, комиссия мүшелері мерейтойдың таңба белгісін таңдады. Сарапқа түскен үш нұсқаның ішінен жергілікті өнер мектебінің оқытушысы Амантай Әкішевтің орындауындағы жұмыс мамандар көңілінен шығып, мерейтой логотипі ретінде мақұлданды.
Автор өзінің жұмысында Бұқар жыраудың суретін салып, жанына «Рухани жаңғыру» бағдарламасының эмблемасын кескіндеген. Сондай-ақ логотипте Тәуке ханның кезіндегі қазақтың «Жеті жарғы» Заңының символдық белгісі ретінде жеті таңба да үйлесімді көрініс тапқан.
Айта кету керек, аталған эмблема Л.Н.Гумилев атындағы ЕҰУ-дің профессоры, белгілі тарихшы Жамбыл Артықбаевтың да оң бағасын алыпты.
Сонымен қатар аталған комиссия отырысында мерейтой өткізуге демеушілер тарту, жыраудың өмірі мен халқына жасаған қызметі туралы деректі фильм мен қысқа метражды бейнероликтер түсіру, баспа және кәдесый өнімдерін жасап шығару сияқты алуан түрлі шаруалар жайы пысықталды.
Бұқар жырау Қалқаманұлының 350 жылдық мерейтойы Ботақара кентінде өтеді. Бұқар жырау ауданының әкімдігі мерейтой қарсаңында аудан орталығын абаттандырып, жолдарды жөндеуді қолға алмақшы.
Қайрат ӘБІЛДА,
«Егемен Қазақстан»
Қарағанды облысы
