Астанада Білім және ғылым министрлігінің кеңейтілген алқа мәжілісі болып, онда білім беру жүйесіндегі сыбайлас жемқорлыққа қарсы заңнаманы сақтау және сыбайлас жемқорлық сипатындағы құқық бұзушылықтың алдын алу, 2011 жылғы ҰБТ-ның қорытындысы, электрондық кітапханалардың қызметі және оларды дамытудың перспективалық бағыттары талқыланды.
Алқа отырысына Қазақстан Республикасы Президенті Әкімшілігі Басшысының орынбасары Бағлан Майлыбаев, Парламент депутаттары, облыстардың, Астана және Алматы қалалары әкімдерінің орынбасарлары, жоғары оқу орындарының, кәсіптік колледждер мен лицейлердің басшылары қатысты.
Білім және ғылым министрі Бақытжан Жұмағұловтың басшылығымен өткен басқосуда министрліктің жауапты хатшысы Болатбек Әбдірәсіловтің «Қазақстан Республикасының білім беру жүйесінде сыбайлас жемқорлыққа қарсы заңнаманы сақтау және сыбайлас жемқорлық сипатындағы құқық бұзушылықтың алдын алу жөніндегі шаралар туралы» баяндамасы тыңдалып, оқу орындарында орын алып отырған жемқорлық пен коррупцияның алдын алу мәселелері жан-жақты сөз болды.
Сондай-ақ басқосу аясында өткен секцияларда ғылым және ғылыми-техникалық қызметтер саласындағы нормативтік-құқықтық базаны жетілдіру, Елбасының Қазақстан халқына Жолдауының негізгі ережелерін іске асыру аясындағы орта және кәсіптік білім беру жүйесінің, жоғары білім беруді және жастар саясатын дамытудың өзекті мәселелері талқыланды.
Берік САДЫР.