«Бұл Ауғанстан үшін ғана емес, елдегі бейбітшілік пен дамуды қалпына келтіруге атсалысып жатқан халықаралық қоғамдастыққа қарсы жасалған қанқұйлы және өрескел әрекет. Қазақстан тарапы жауапкершілікті сезіне отырып, Ауғанстандағы терроризм мәселесін түбегейлі шешу үшін жедел шаралар қабылдау қажет екенін мәлімдейді», делінген Сыртқы істер министрлігі таратқан мәлімдемеде.
Қазақстан тарапы Ауғанстандағы барлық саяси күштерді татуласу бойынша келіссөздер жүргізуге шақырады. Сонымен қатар БҰҰ Қауіпсіздік Кеңесінің Төрағасы ретінде елдегі жағдайды тұрақтандыруға, терроризмді жоюға және қалпына келтіруге жан-жақты жәрдем көрсететіні айтылған.
«БҰҰ Қауіпсіздік Кеңесі Төрағасының қаңтарда қабылдаған мәлімдемесі халықаралық қоғамдастықты елдегі саяси жағдайды тұрақтандыру мақсатында Ауғанстанға қолдау көрсетуге шақырады. Қаза болғандардың туыстары мен жақындарына көңіл айтамыз, сондай-ақ жарақат алғандардың тез арада сауығып кетуін тілейміз», делінген министрліктің мәлімдемесінде.
Сенбі күні Кабулдағы «Интерконтиненталь» қонақ үйіне қарулы басбұзарлар басып кіріп, 20-дан астам адамды жайратып салған. Оқиғаны «Талибан» террористік ұйымы өз мойнына алып отыр. Қаза тапқандар арасында қазақстандық бір азамат бар. Бақилық болған отандасымыздың отбасы мен туған-туыстарына қайғырып көңіл айтамыз.
