«Күнтізбелік жоспарға сәйкес, республикалық деңгейдегі Қазақстан кубогы мен Қазақстан чемпионатын өткізбекпіз. Бұл біздің кезекті жарыстарымыз. Онымен қоса басқа федерациялармен біріккен жарыстар ұйымдастырылады. Ең маңыздысын айтсам, маусым айының ортасында киокушинкай-кан каратэден Азия чемпионатын өткіземіз деп жоспарлап отырмыз. Ол - халықаралық жарыс. Қазіргі уақытта Халықаралық киокушинкай-кан каратэ федерациясы бізге қолдау білдірді. Соған сай дайындық жүргізіліп жатыр. Біздің құрамамыз нәтиженің ең жоғарғы көрсеткішін сол жерде көрсетсе екен деген тілегіміз бар», - дейді Омархан Өксікбаев Астанадағы «Сарыарқа» велотрегінде спортшылармен кездесу барысында.
Еске сала кетсек, Украинаның Одесса қаласынан «алтынға толы» қоржынмен оралған саңлақтарымыздың басын Ұлттық республикалық Киокушинкай-кан каратэ федерациясы бүгін Астанадағы «Сарыарқа» велотрегінде қосқан болатын. Қазақ спортшылары аталған додадан 12 алтын, 4 күміс пен 1 қола медаль алып келіп отыр. Федерация президенті Омархан Өксікбаевтың айтуынша, Қазақстан спортшылары бұрын соңды киокушинкай-кан каратэден Әлем чемпионатында мұндай зор жетістікке қол жеткізбеген.
