Осындай игі шараларды ұйымдастыру арқылы саламатты өмір салтын ұстануды және қоршаған ортаны қорғауды үйретуге болатынын кейбіреулер қаперге ала бермейді. Сондай-ақ аталған сайыстарды өткізу арқылы кәсіпқойлық және спорттық балық ұстау машықтарын жетілдіру мақсаты да алға қойылған. Бұланды аудандық дене шынықтыру және спорт бөлімі Қараөзек ауылдық округінде спорттық балық аулаудан жарыс өткізуі де сондықтан.
Спорттық жарыс өткізу арқылы қатысушылардың табиғат берген ризықты өздері тауып жеуіне, шүйіркелесіп бір-бірімен пікір алмасуына мүмкіндік береді. Көл бетінен қазылған ойықтар балық аулаумен қатар сол балықтарға ауадай қажет судың құрамын оттегімен құнарландыру үшін де жасалатындығын ерекше атаған жөн. Кәнігі балықшылар жақсы ауланатын жерлерді айтпай танитындығы қаперге алынып, олардың арасында жеребе тасталды. Әйтсе де оларға екі қармақпен аулауға, қанша ілмек ілсе де оған шектеу қойылмады. Әрбір қатысушының балықты аулаудағы сан алуан тәсілдеріне де рұқсат етілді. Нәтижесінде Капитоновка ауылының командасы көп балық аулап, чемпион атанды. Ал Макинск қаласының балықшылары екінші тұғырдан көрінді. Жергілікті Қараөзек ауылдық округінің спортшылары үшінші орынды қанағат тұтты.
Асқар ТҰРАПБАЙҰЛЫ,
«Егемен Қазақстан»
Ақмола облысы
