Аймақтар • 09 Ақпан, 2018

Павлодарда «Сағым жылдар» әжелер ансамблі құрылды

1375 рет
көрсетілді
3 мин
оқу үшін

Облыс орталығындағы Қ.Әбусейітов атындағы мәдени-сауық орталығында құрылған  әжелер ансамблі «Сағым жылдар» деп аталады. Ансамбль құрамында ән салатын әжелер өткен жылдар әндерін әуелетіп, қайта оралмас  жастық шақтың сағымдай бұлдыраған күндерін  есіңізге салады. 

Павлодарда «Сағым жылдар» әжелер ансамблі құрылды

Суретті түсірген Дмитрий Пархоменко

­­­­

Ансамбль атауын әжелер өздері таң­даған. Әнші Мәдина Ералиева орындаған «Сағындым, сағым жылдар» дейтін әнмен ансамбльдің аталуында мән бар. Айналып келген адамның бүкіл өмірі сағыныштан тұрады ғой. Әннің  өзі де, сөзі де сол сағыныштың сазды ирім­дері.  

Ол әнді шырқап жатқан әже­лердің жүздері жарқын, жандары жас. Әрқайсы салиқалы ұрпақ өсіріп, шө­бере сүйіп отырған ұлағатты аналар. Өмір­лері де, көңілдері де хош. Бірақ жүректері сағым жылдарын сағынады, дейді  ансамбльдің музыкалық  жетек­шісі Қазигүл Батырханқызы. 

Ансамбльдің  үлкені Бақытжамал  әже Елеукенқызы  71 жаста  екен. Ал зейнет жасына жеткен Қазигүл Батыр­ханқызы, Любовь Нұрғазинова апалар бұрынғы салық қызметкерлері,  Манат Батталқызы кітапханашы, Раушан Мейрамова медбике, Кенже Құсайынова есеп­ші, Роза Ахметова ағылшын тілі пәні­нің мұғалімі, Қарлығаш Маутина  же­ке кәсіпкер, Жібек Қабылкенова поли­ция бөлімінде қызмет жасапты. Әжелер ансамблінің көркемдік жетек­шісі Гайнутдин Ташимов.

Әжелердің сондай-ақ бір бойынан бірнеше өнерді байқауға болады. Ән-қор­жындарынан сырлы саз төгілсе, үйле­ріндегі сандық, кебежелерінен түрлі қолөнер бұйымдарын кездесті­ресіз. Осылардың арасында облыстық, қалалық деңгейде өткізілген барлық мәдени шараларға белсенді қатысады.  Әже­лердің  «Сағым жылдар»  ансамблін облыс орталығындағы Қарттар үйі, «Денсаулық», «Ардагер» санаторийлері асы­ға күтеді. 

«Зағип және мүмкіндіктері шектеулі жандар үшін де жиі-жиі қайырымдылық концерттерін өткіземіз.  Бізбен қосылып ән айтып, көңілдері шарықтап,бір жасап қалады. Сағым жылдар – әр жүректе жүр. Ән айтып қана қоймай, бауырсақ, құрт-ірімшік, қымыз, қоспа сияқты ұлт­тық тағамдардан ауыз тигізіп, шашу шашып, тыңдаушылардың ықыластарына бөленеміз», дейді  Бақытжамал әже. 

Сон­дай-ақ аталмыш ансамбль – об­лыс­тық «Ертіс» телеарнасындағы «Салт-дәстүр» бағдарламасының тұ­рақ­ты қонақтары. Бағдарламада бо­лашақ жастарға қазақтың ұлттық салт-дәстүрлері жайлы келелі кеңестер айтып отырады. Әсем әнді әжелерді сонымен қатар Г.Потанин, Бұқар жырау атындағы му­зей­дің, қалалық, облыстық кітапха­наларындағы жастар үнемі кездесуге шақырып отырады.

«Біздің орталықта  мектеп жасын­дағы балаларға арналған үйірмелер  жұмыс істейді. Әжелердің сахнаға, мерекелерге, кездесулерге киіп баратын ұлттық киімдерінің өрнектері өз қолдарымен жасалған. Іші әнге, сырты сәнге толған әжелер ансамблін құрудағы мақсатымыз – жастар да дәстүрлі халық әндерін естіп, олар да салт-дәстүр, ұлттық қолөнердің бай мұрасымен жақын танысса деген тілек», дейді орталық   директоры Алма  Арынова.

Фарида БЫҚАЙ,
«Егемен Қазақстан»
ПАВЛОДАР